കൊച്ചി: കൊച്ചി കതൃക്കടവിലെ ബാറിനു മുന്നിലുണ്ടായ വെടിവെപ്പ് കേസിൽ നാലുപേർകൂടി പിടിയിൽ. അഞ്ചാം പ്രതി മനുവും പിടിയിലായവരിൽ ഉൾപ്പെടും. പ്രതികളെ ഒളിവിൽ പോകാൻ സഹായിച്ചവരാണ് മറ്റു മൂന്നുപേർ. ഇതോടെ കേസിൽ പിടിയിലായവരുടെ എണ്ണം ഏഴായി.

സംഘാംഗങ്ങളായ വിജയ് ബോസ്, ഷമീർ, ദിൽഷൻ ബോസ് എന്നിവരെ നേരത്തേ അറസ്റ്റുചെയ്തിരുന്നു. വെടിയുതിർത്ത ഒന്നാംപ്രതി വിനീത് പിടിയിലാകാനുണ്ട്. കരുതിക്കൂട്ടിയുള്ള വധശ്രമം, ദേഹോപദ്രവം ഏൽപിക്കൽ തുടങ്ങിയ വകുപ്പുകളാണ് പ്രതികൾക്കെതിരേ ചുമത്തിയിരിക്കുന്നത്. മുമ്പും ക്രിമിനൽ കേസുകളിൽ ഉൾപ്പെട്ടിട്ടുള്ളവരാണ് പ്രതികളെന്നാണ് വിവരം.

ഞായറാഴ്ച രാത്രി 11.30-ഓടെയാണ് സംഭവം. ഇടപ്പള്ളിയിലെ ബാറിൽനിന്ന് മദ്യപിച്ചെത്തിയ സംഘം കതൃക്കടവിലെ ബാറിലെത്തി മദ്യം ആവശ്യപ്പെട്ടു. ബാർ അടച്ചതിനാൽ മദ്യം നൽകാനാവില്ലെന്ന് ജീവനക്കാരൻ അറിയിച്ചതിനെത്തുടർന്ന് വാക്കേറ്റമുണ്ടാവുകയും പ്രതികളിലൊരാൾ കയ്യിൽ കരുതിയിരുന്ന പിസ്റ്റൾ ഉപയോഗിച്ച് വെടിയുതിർക്കുകയുമായിരുന്നു.