തൃശൂർ: വാഹനങ്ങളിൽ നിന്ന് ബാറ്ററി മോഷ്ടിച്ച് വിൽപ്പന നടത്തുന്ന അന്തർസംസ്ഥാന മോഷ്ടാക്കൾ പിടിയിൽ. മോഷണം നടത്തിയ ശേഷം ഓട്ടോറിക്ഷയിൽ വരികയായിരുന്ന സംഘത്തെ അഞ്ഞൂരിൽ വച്ചാണ് പൊലീസ് അറസ്റ്റ് ചെയ്തത്.

കൊൽക്കത്ത സ്വദേശികളായ ഷുക്കൂർ അലി, മുഹദുൾ ഖാൻ ഉത്തർപ്രദേശിലെ ഗസ്സിയാബാദ് സ്വദേശി സൂരജ് സൈനി, ഡൽഹി സ്വദേശി ഫാറൂഖ് എന്നിവരെയാണ് വടക്കേക്കാട് പൊലീസ് അറസ്റ്റ് ചെയ്തത്. കുന്നംകുളം കാണിപ്പയൂരിലെ വർക്ക്ഷോപ്പ് കുത്തിതുറന്ന് കവർച്ച നടത്തി മടങ്ങുകയായിരുന്നു സംഘം.

ഇവരിൽ നിന്ന് നാല് ബാറ്ററിയടക്കമുള്ള മോഷണ വസ്തുക്കൾ പൊലീസ് പിടിച്ചെടുത്തു. മോഷണത്തിന് ഉപയോഗിക്കുന്ന ഉപകരണങ്ങളും കണ്ടെടുത്തു. മജിസ്ട്രേറ്റിന് മുന്നിൽ ഹാജരാക്കിയ പ്രതികളെ റിമാൻഡ് ചെയ്തു.