ഉത്സവം കണ്ടു വീട്ടിലേക്കു മടങ്ങവെ അപകടം; ദമ്പതികൾ സഞ്ചരിച്ചിരുന്ന സ്‌കൂട്ടർ മറിഞ്ഞു; യുവതിക്ക് ദാരുണാന്ത്യം

തിരുവനന്തപുരം: കല്ലമ്പലം ദേശീയപാതയിൽ ആഴാംകോണം ജംക്ഷനു സമീപം ദമ്പതികൾ സഞ്ചരിച്ചിരുന്ന സ്‌കൂട്ടർ മറിഞ്ഞ് യുവതി മരിച്ചു. ഭർത്താവും മക്കളും പരുക്കുകളോടെ രക്ഷപ്പെട്ടു. കീഴൂർ ദുർഗാ ഭഗവതി ക്ഷേത്രത്തിലെ ഉത്സവം കണ്ടു വീട്ടിലേക്കു മടങ്ങുമ്പോഴായിരുന്നു അപകടം. ഇന്നു പുലർച്ചെയായിരുന്നു അപകടം.

ആഴാംകോണം മുല്ലമംഗലം വൈഗ ലാൻഡിൽ രഞ്ചുലാലിന്റെ ഭാര്യ ലക്ഷ്മി (29) ആണ് മരിച്ചത്. റോഡിൽ തെറിച്ചു വീണ ലക്ഷ്മി, പണി നടന്നു കൊണ്ടിരിക്കുന്ന കോൺക്രീറ്റ് പാളികളിൽ തല തട്ടി പരുക്കേറ്റിരുന്നു. തുടർന്ന് പാരിപ്പള്ളി മെഡിക്കൽ കോളജ് ആശുപത്രിയിൽ പ്രവേശിപ്പിച്ചെങ്കിലും മരിച്ചു.

ദേശീയപാതയിലെ റോഡ് നിർമ്മാണവുമായി ബന്ധപ്പെട്ട് പണികൾ നടക്കുന്നതിനാൽ പല സ്ഥലങ്ങളിലും കുഴി നിറഞ്ഞ നിലയിലാണ്. സമീപത്തെ കോൺക്രീറ്റ് പാളികളിൽ തട്ടി നിയന്ത്രണം തെറ്റിയതോ അല്ലെങ്കിൽ സ്‌കൂട്ടറിന്റെ സ്റ്റാൻഡ് റോഡിൽ തട്ടി വീണതോ ആകാം അപകടകാരണമെന്ന് പൊലീസ് പറഞ്ഞു. മക്കൾ: വൈഗ, നൈക.