പുൽപ്പള്ളി 56ൽ ഇന്നും കടുവയിറങ്ങി; വീടിന് പുറത്തുനിൽക്കുമ്പോൾ കടുവയെ കണ്ടതായി പ്രദേശവാസി; മയക്കുവെടി വച്ച് പിടികൂടാൻ ആർആർടി സംഘം

പുൽപ്പള്ളി: പുൽപ്പള്ളി 56ൽ ഇന്നും കടുവയിറങ്ങി. വാഴയിൽ ബിനീഷിന്റെ ഭാര്യ ചിന്നു രാവിലെ ഒൻപത് മണിക്ക് വീടിന് പുറത്തുനിൽക്കുമ്പോൾ കടുവയെ കണ്ടതായി പറഞ്ഞു. തുടർന്ന് ആർആർടി സംഘം മയക്കുവെടി വയ്ക്കാൻ കടുവയ്ക്കായി തിരച്ചിൽ നടത്തുകയാണ്.

ഇന്നലെയാണ് പുൽപ്പള്ളി 56ൽ ബൈക്ക് യാത്രികൻ വാഴയിൽ അനീഷിന്റെ മുന്നിലേക്കു കടുവ ചാടിവീണത്. ബൈക്കിൽനിന്നു വീണു പരുക്കേറ്റ അനീഷിനെ ആശുപത്രിയിൽ പ്രവേശിപ്പിച്ചു. കഴിഞ്ഞ ദിവസം കടുവ വാഴയിൽ ബേബിയുടെ മൂരിക്കിടാവിനെ കൊന്നിരുന്നു.

ആശ്രമ കൊല്ലി ഐക്കരക്കുടി എൽദോസിന്റെ പശുക്കിടാവിനെയും കടുവ കൊന്നു. പിന്നീട് പല തവണ നാട്ടുകാർ കടുവയെ കണ്ടു. ജനകീയ പ്രക്ഷോഭത്തെത്തുടർന്നാണ് മയക്കുവെടി വയ്ക്കാൻ തീരുമാനമായത്.

പുൽപ്പള്ളി സുരഭിക്കവലയിലും പരിസരത്തുമായി വനംവകുപ്പ് 3 കൂടുകൾ സ്ഥാപിച്ച് ആഴ്ചകളായിട്ടും കടുവയെ കൂട്ടിലാക്കാനായിട്ടില്ല. ബത്തേരി ഡോൺ ബോസ്‌കോ കോളജ് ഗേറ്റിനു മുന്നിൽ വിദ്യാർത്ഥിനികൾ കടുവയെ കണ്ടു ഭയന്നോടി.