തിരുവനന്തപുരം: മുഖ്യമന്ത്രിക്ക് നീന്തൽകുളം... സ്പീക്കർക്ക് ജിമ്മും! കേരളം സാമ്പത്തിക പ്രതിസന്ധിയിൽ ഉഴലുമ്പോൾ ആരോഗ്യം നേരെയാക്കാൻ ജിം തയ്യാറാക്കുകയാണ് സ്പീക്കർ. സ്പീക്കർ എ.എൻ.ഷംസീറിന്റെ ഔദ്യോഗിക വസതിയിൽ ഫിറ്റ്‌നസ് ഉപകരണങ്ങൾ സ്ഥാപിക്കാൻ ടെൻഡർ ക്ഷണിച്ചു.
3 ഫിറ്റ്‌നസ് ഉപകരണങ്ങൾ വാങ്ങാനാണ് ടെൻഡർ. ട്രെഡ്മിൽ, ലെഗ് കെൾ ആൻഡ് ലെഗ് എക്‌സ്റ്റെൻഷൻ മെഷീൻ കൊമേഴ്ഷ്യൽ ക്രോസ് ട്രെയിനർ മെഷീൻ എന്നിവയാണ് വാങ്ങുന്നത്. ഒരു കൊച്ച് ഫിറ്റ്‌നസ് ജിം പണിയുകയാണ് ലക്ഷ്യം. വാങ്ങാനുദ്ദേശിക്കുന്ന ഉപകരണങ്ങൾക്കു വേണ്ട സാങ്കേതിക യോഗ്യതകൾ ടെൻഡറിൽ വിവരിച്ചിട്ടുണ്ട്. ട്രെഡ്മിൽ 5 എച്ച്പിക്ക് മുകളിലുള്ളതായിരിക്കണം. സമയം, ദൂരം, കലോറി, പവർ, ഹാർട്ട് റേറ്റ് അടക്കമുള്ള വിവരങ്ങൾ പ്രദർശിപ്പിക്കുന്ന എൽഇഡി സ്‌ക്രീൻ ഉണ്ടായിരിക്കണം. ലെഗ് കെൾ ആൻഡ് ലെഗ് എക്‌സ്റ്റെൻഷൻ മെഷീന് ഉപയോഗിക്കാൻ കഴിയുന്ന ഭാരപരിധി 180 കിലോയ്ക്കു മുകളിലായിരിക്കണമെന്നു നിർദ്ദേശിച്ചിട്ടുണ്ട്.
കൊമേഴ്ഷ്യൽ ക്രോസ് ട്രെയിനർ മെഷീനും ഉപയോഗിക്കാൻ കഴിയുന്ന ഭാരപരിധി 180 കിലോയ്ക്ക് മുകളിലായിരിക്കണം. സാധാരണ വീടുകളിൽ ഉപയോഗിക്കുന്ന ഫിറ്റ്‌നസ് ഉപകരണങ്ങൾ വാങ്ങാനാണ് താൽപര്യപത്രം ക്ഷണിച്ചിരിക്കുന്നതെന്ന് സ്പീക്കറുടെ ഓഫിസ് അറിയിച്ചു.
