പൊന്നാനിയിൽ വൻ മയക്കുമരുന്ന് വേട്ട; ലഹരി സംഘത്തിലെ പ്രധാനികൾ പിടിയിൽ

മലപ്പുറം: പൊന്നാനിയിൽ 305 ഗ്രാം മെത്താംഫിറ്റമിൻ സഹിതം രണ്ടു യുവാക്കളെ പിടികൂടിയെന്ന് എക്സൈസ്. പൊന്നാനി മാറഞ്ചേരി സ്വദേശി മുഹമ്മദ് ബഷീർ, പട്ടാമ്പി എറവക്കാട് സ്വദേശി സാബിർ എന്നിവരെയാണ് പൊന്നാനി എക്സൈസ് സർക്കിൾ ഇൻസ്‌പെക്ടർ എസ് ജി അരവിന്ദ് അറസ്റ്റ് ചെയ്തത്. മലപ്പുറം, പാലക്കാട്, തൃശൂർ ജില്ലകളിൽ രാസലഹരി എത്തിക്കുന്ന സംഘത്തിലെ പ്രധാനികളാണ് പിടിയിലായതെന്ന് എക്സൈസ് അറിയിച്ചു.

കാളികാവ് റേഞ്ച് ഇൻസ്‌പെക്ടർ നൗഫൽ ശേഖരിച്ച രഹസ്യ വിവരത്തിന്റെ അടിസ്ഥാനത്തിൽ എക്സൈസ് കമ്മീഷണർ സ്‌ക്വാഡും, മലപ്പുറം ഐബിയും, പൊന്നാനി സർക്കിൾ പാർട്ടിയും സംയുക്തമായിട്ടാണ് പരിശോധന നടത്തിയത്.

പരിശോധന സംഘത്തിൽ എക്സൈസ് ഇൻസ്‌പെക്ടർമാരായ നൗഫൽ എൻ, ഷിജു മോൻ ടി, അസിസ്റ്റന്റ് എക്സൈസ് ഇൻസ്‌പെക്ടർ (ഗ്രേഡ്) ശ്രീകുമാർ സി, മുരുകൻ, പ്രിവന്റ്‌റീവ് ഓഫീസർ (ഗ്രേഡ്) പ്രമോദ് പി. പി, ഗിരീഷ് ടി, സിവിൽ എക്സൈസ് ഓഫീസർ അഖിൽദാസ് ഇ, വനിത സിവിൽ എക്സൈസ് ഓഫീസർ ജ്യോതി, എക്സൈസ് ഡ്രൈവർ പ്രമോദ് എന്നിവരും പങ്കെടുത്തു.