ബത്തേരിയിൽ പൊലീസ് വാഹനം സ്‌കൂട്ടറിൽ ഇടിച്ച് കയറി അപകടം; മൂന്ന് പേർക്കു ഗുരുതര പരുക്ക്; ഭയന്ന പൊലീസ് ഡ്രൈവർ ഇറങ്ങിയോടി

ബത്തേരി: വയനാട് സുൽത്താൻബത്തേരിയിൽ പൊലീസ് വാഹനം ഇടിച്ചുകയറി സ്‌കൂട്ടറിൽ സഞ്ചരിച്ചിരുന്ന മൂന്ന് പേർക്കു ഗുരുതര പരുക്ക്. മലപ്പുറം വാഴക്കാട് പുൽപ്പറമ്പിൽ ജാസിദ് (33), ഭാര്യ ഷാഹിന ( 30) മകൻ ജുവാൻ (3) എന്നിവർക്കാണു പരുക്കേറ്റത്. ഇവരെ സമീപത്തെ ആശുപത്രിയിൽ പ്രവേശിപ്പിച്ചു.

സുൽത്താൻ ബത്തേരി അസംപ്ഷൻ ജംക്ഷനിൽ 3.45ഓടെയാണ് അപകടം. പൊലീസ് ബാരിക്കേഡുകൾ കൊണ്ടുപോകാനായി എആർ ക്യാംപിൽനിന്നെത്തിയ ടെംപോ വാഹനം തട്ടിയാണ് അപകടം ഉണ്ടായത്. അപകടത്തെ തുടർന്ന് വാഹനത്തിലെ ഡ്രൈവറടക്കം ഇറങ്ങിയോടി.

സംഭവസ്ഥലത്ത് ഓടിക്കൂടിയ നാട്ടുകാരാണ് പരുക്കേറ്റവരെ ആശുപത്രിയിലെത്തിച്ചത്. പൊലീസ് വാഹനത്തിന്റെ ഡ്രൈവർ മദ്യപിച്ചതായും ആരോപണമുണ്ട്. അപകടത്തെ കുറിച്ച് സുൽത്താൻ ബത്തേരി പൊലീസ് അന്വേഷണം തുടങ്ങിയിട്ടുണ്ട്.