എംസി റോഡിൽ കാറും ലോറിയും കൂട്ടിയിടിച്ച് അപകടം; കാർ തലകീഴായി മറിഞ്ഞു; യാത്രക്കാർ അത്ഭുതകരമായി രക്ഷപ്പെട്ടു

കൊച്ചി: മൂവാറ്റുപുഴ-കൂത്താട്ടുകുളം എംസി റോഡിൽ കാറും ലോറിയും കൂട്ടിയിടിച്ച് കാർ തലകീഴായി മറിഞ്ഞെങ്കിലും യാത്രക്കാർ അത്ഭുതകരമായി രക്ഷപ്പെട്ടു. ഇന്ന് രാവിലെ എട്ട് മണിയോടെയായിരുന്നു സംഭവം. മൂവാറ്റുപുഴ-കൂത്താട്ടുകുളം റോഡിൽ ആറൂർ മഞ്ഞമാക്കിത്തടം ജംഗ്ഷനിലാണ് അപകടം നടന്നത്. അപകടസമയത്ത് മൂന്ന് പേരാണ് കാറിൽ ഉണ്ടായിരുന്നത്.

ഇടിയുടെ ആഘാതത്തിൽ കാർ തലകീഴായി മറിയുകയായിരുന്നു. മൂവാറ്റുപുഴ ഭാഗത്ത് നിന്നും കൂത്താട്ടുകുളത്തേക്ക് പോകുകയായിരുന്ന ടോറസ് ലോറിയും, കൂത്താട്ടുകുളത്ത് നിന്നെത്തിയ കാറും തമ്മിലാണ് കൂട്ടിയിടിച്ചത്.

അപകടത്തിൽ കാറിന്റെ മുൻഭാഗം പൂർണമായും തകർന്നിട്ടുണ്ട്. കാറിന്റെ ടയറുകളുൾപ്പെടെ വേർപെട്ട നിലയിലാണ്. അപകടത്തിൽ നിസാര പരിക്കേറ്റവർ മൂവാറ്റുപുഴയിലെ ആശുപത്രികളിൽ പ്രാഥമിക ചികിത്സ തേടി.