തൃശൂർ: കാഞ്ഞാണിയിൽ നിന്ന് കാണാതായ അമ്മയേയും കുഞ്ഞിനേും മരിച്ച നിലയിൽ കണ്ടെത്തി. മണലൂർ സ്വദേശി കൃഷ്ണപ്രിയ (24), മകൾ പൂജിത (ഒന്നര വയസ്) എന്നിവരാണ് മരിച്ചത്. മൃതദേഹം കാക്കമാട് പ്രദേശത്തെ പുഴയിൽ നിന്നാണ് കണ്ടെത്തിയത്. ഇവരുടെ ഐഡി കാർഡ് പൊലീസിന് ലഭിച്ചിട്ടുണ്ട്.

ഇന്നലെ ഉച്ചയ്ക്കാണ് ഇവരെ കാണാതായത്. ഉച്ചയ്ക്ക് രണ്ടരമണിക്ക് ഭർതൃഗൃഹത്തിലേക്ക് പുറപ്പെട്ട ഇരുവരെയും പിന്നീട് കാണാതാവുകയായിരുന്നു. ഇതുസംബന്ധിച്ച് അന്തിക്കാട് സ്വദേശി അഖിൽ പൊലീസിൽ പരാതി നൽകിയിരുന്നു. പരാതിയുടെ അടിസ്ഥാനത്തിൽ അന്വേഷണം നടത്തുന്നതിനിടെയാണ് മൃതദേഹങ്ങൾ കണ്ടെത്തിയത്. കാഞ്ഞാണിയിലെ മെഡിക്കൽ ഷോപ്പിലെ ജീവനക്കാരിയാണ് കൃഷ്ണപ്രിയ.

ഭർതൃഗൃഹത്തിലേക്ക് പോകുന്നു എന്ന് പറഞ്ഞാണ് കുഞ്ഞിനെയും കൂട്ടി കൃഷ്ണപ്രിയ സ്വന്തം വീട്ടിൽ നിന്ന് ഇറങ്ങിയത്. രാത്രിയായിട്ടും ഇരുവരും വീട്ടിൽ എത്താതിരുന്നതിനെ തുടർന്നാണ് അന്തിക്കാട് പൊലീസിൽ പരാതി നൽകിയത്. രാവിലെ നടക്കാൻ പോകുന്നവരാണ് മൃതദേഹങ്ങൾ കണ്ടെത്തിയത്. മരണകാരണം സംബന്ധിച്ച് ഇതുവരെ വ്യക്തത വന്നിട്ടില്ല. പൊലീസ് അന്വേഷണം ആരംഭിച്ചു.