വൈക്കം: കനത്ത വേനൽച്ചൂടിനെത്തുടർന്ന് വെള്ളം ശേഖരിക്കുന്ന ക്യാൻ പൊട്ടിത്തെറിച്ചു. വൈക്കം തോട്ടുവക്കം സമീർ നിവാസിൽ സമീർ യൂസഫിന്റെ വീടിന്റെ മുകളിലെത്തെ നിലയിൽ സ്ഥാപിച്ചിരുന്ന 10 വർഷം പഴക്കമുള്ള 600 ലിറ്ററിന്റെ ക്യാൻ ആണ് പൊട്ടിയത്.

വെള്ളിയാഴ്ച രാവിലെ 11.45-ഓടെയാണ് സംഭവം. വലിയ ശബ്ദംകേട്ട് വീട്ടുകാർ നോക്കിയപ്പോഴാണ് ക്യാൻ പൊട്ടി വെള്ളം പുറത്തേക്ക് ഒഴുകുന്നത് കണ്ടത്. കിണറ്റിൽനിന്നുള്ള വെള്ളം ആദ്യം ഈ ക്യാനിൽ എത്തിയ ശേഷമാണ് മറ്റു രണ്ട് വാട്ടർ ടാങ്കുകളിലേക്കും പോകുന്നത്. മൂന്നിലും നിറയെ വെള്ളമുണ്ടായിരുന്നതായി വീട്ടുകാർ പറഞ്ഞു. വെയിലേറ്റപ്പോൾ, വെള്ളത്തിലുണ്ടായ മർദ്ദവ്യത്യാസവും കാലപ്പഴക്കവുംമൂലമാകാം ഇത് സംഭവിച്ചതെന്ന് ജല അഥോറിറ്റി എൻജിനീയർമാർ പറഞ്ഞു.