കോഴിക്കോട്: ഓടിക്കൊണ്ടിരുന്ന കാറിന് മുകളിൽ റോഡരികിലെ വലിയ തണൽ മരത്തിന്റെ കൊമ്പ് പൊട്ടിവീണ് അപകടം. കാറിൽ യാത്രചെയ്തിരുന്ന യുവാവ് തലനാരിഴയ്ക്കാണ് പരിക്കേൽക്കാതെ രക്ഷപ്പെട്ടത്. കോഴിക്കോട് കുന്ദമംഗലം പടനിലത്താണ് അപകടം നടന്നത്.

പിലാശ്ശേരി ഭാഗത്തു നിന്നും വയനാട്ടേക്ക് പോകുകയായിരുന്ന മുഹമ്മദ് സിനാൻ സഞ്ചരിച്ച കാറാണ് അപകടത്തിൽപ്പെട്ടത്. ഉച്ചക്ക് 2.30ഓടെയാണ് സംഭവം. കാറിന്റെ ബോണറ്റിന് മുകളിലാണ് വലിയ മരക്കൊമ്പ് വീണത്. ഉടൻ തന്നെ സിനാൽ കാറിൽ നിന്ന് പുറത്തിറങ്ങുകയായിരുന്നു. ബംബറും ബോണറ്റും ഉൾപ്പെടെയുള്ള മുൻവശം തകർന്ന നിലയിലാണ്.

ഓടിക്കൂടിയ നാട്ടുകാരും വിവരം അറിഞ്ഞെത്തിയ ഫയർഫോഴ്സും കുന്നമംഗലം പൊലീസും ചേർന്ന് മരം മുറിച്ചു മാറ്റി. അപകടം നടന്നതിനെ തുടർന്ന് കുന്ദമംഗലം - വയനാട് റോഡിൽ വലിയ ഗതാഗത തടസ്സം രൂപപ്പെട്ടു. ഒരു മണിക്കൂറിലധികം കഴിഞ്ഞാണ് ഇതുവഴിയുള്ള ഗതാഗതം പുനഃസ്ഥാപിക്കാൻ സാധിച്ചത്.