മംഗളൂരു: ബെംഗളൂരുവിൽനിന്ന് മംഗളൂരുവിലേക്ക് എം.ഡി.എം.എ. കടത്താൻ ശ്രമിച്ച നാല് യുവാക്കൾ സിറ്റി ക്രൈംബ്രാഞ്ച് പൊലീസിന്റെ പിടിയിൽ. ഇവരിൽനിന്ന് ആറരലക്ഷം രൂപ വിലവരുന്ന 270 ഗ്രാം എം.ഡി.എം.എ. പിടിച്ചെടുത്തു. അഡ്ഡൂർ സ്വദേശികളായ മുഹമ്മദ് അമീൻ റാഫിഹ് (24), മുഹമ്മദ് സിനാൻ അബ്ദുള്ള (23), ബന്ദറിലെ മുഹമ്മദ് നുഹ്‌മാൻ (22), ഉള്ളാൾ സ്വദേശി മുഹമ്മദ് സഫീൽ (23) എന്നിവരാണ് അറസ്റ്റിലായത്. അടുത്തകാലത്ത് മംഗളൂരുവിൽ നടന്ന വലിയ മയക്കുമരുന്ന് വേട്ടയാണിത്.

മംഗളൂരുവിലേക്ക് കാറിൽ മയക്കുമരുന്ന് കൊണ്ടുവരുമ്പോൾ ദർളകട്ടെയിൽ വാഹന പരിശോധനയ്ക്കിടെയാണ് അറസ്റ്റ്. നാല് മൊബൈൽഫോൺ, ഡിജിറ്റൽ തൂക്കുയന്ത്രം, കാർ എന്നിവ പൊലീസ് കസ്റ്റഡിയിലെടുത്തു. പ്രതികൾ ബെംഗളൂരുവിൽനിന്ന് മയക്കുമരുന്ന് വാങ്ങി കേരളത്തിലും മംഗളൂരുവിലും വിൽക്കുന്നത് പതിവായിരുന്നു. മുഹമ്മദ് അമീൻ റാഫിക്കെതിരേ മയക്കുമരുന്ന് കടത്തിയതിന് മംഗളൂരു സൗത്ത് സ്റ്റേഷനിൽ കേസുണ്ടെന്ന് പൊലീസ് അറിയിച്ചു.