പുല്പള്ളി: കർണാടകയിൽനിന്ന് കഞ്ചാവ് വാങ്ങി ഓട്ടോറിക്ഷയിൽ ഒളിപ്പിച്ചുകടത്തിക്കൊണ്ടുവന്ന ദമ്പതികളെ പൊലീസ് പിടികൂടി. കോഴിക്കോട് സ്വദേശികളായ കുന്നുമ്മൽ പി.കെ. മുഹമ്മദ് അർഷാദ് (36), ഭാര്യ എൻ.കെ. ഷബീനാസ് (34) എന്നിവരെയാണ് എക്‌സൈസ് അറസ്റ്റ് ചെയ്തത്. ഇവരിൽനിന്ന് 935 ഗ്രാം കഞ്ചാവ് പിടിച്ചെടുത്തു.

ചൊവ്വാഴ്ച ഉച്ചയ്ക്ക് ബത്തേരി എക്സൈസ് സർക്കിൾ പാർട്ടിയും കേരള എക്സൈസ് മൊബൈൽ ഇന്റർവെൻഷൻ യൂണിറ്റും ചേർന്ന് പെരിക്കല്ലൂരിൽ നടത്തിയ പരിശോധനയിലാണ് ഇരുവരും പിടിയിലായത്. ഓട്ടോറിക്ഷയിലെ യാത്രക്കാരുടെ സീറ്റിന് പിന്നിലായാണ് കഞ്ചാവ് ഒളിപ്പിച്ചു കടത്തിയത്. കോഴിക്കോട്ടുനിന്നും ഓട്ടോറിക്ഷയിലെത്തിയ ദമ്പതിമാർ പെരിക്കല്ലൂരിൽനിന്ന് തോണിമാർഗം കർണാടകയിലെ ബൈരക്കുപ്പയിലെത്തിയാണ് കഞ്ചാവ് വാങ്ങിയത്. 20,000 രൂപ നൽകിയാണ് കഞ്ചാവ് വാങ്ങിയതെന്നാണ് ചോദ്യംചെയ്യലിൽ ഇവർ മൊഴി നൽകിയിട്ടുള്ളത്.

ബത്തേരി എക്സൈസ് സർക്കിൾ ഇൻസ്പെക്ടർ എൻ.കെ. ഷാജിയുടെ നേതൃത്വത്തിൽ പ്രിവന്റ്ീവ് ഓഫീസർമാരായ എ.എസ്. അനീഷ്, സുനിൽ കുമാർ, ഇ.സി. ദിനേശൻ, സിവിൽ എക്സൈസ് ഓഫീസർമാരായ വി സി. സുമേഷ്, കെ.വി. രാജീവൻ, വനിതാ സിവിൽ എക്സൈസ് ഓഫീസർ എം. ശ്രീജിന, സിവിൽ എക്സൈസ് ഡ്രൈവർമാരായ അൻവർ സാദത്ത്, വീരാൻ കോയ എന്നിവരടങ്ങിയ സംഘമാണ് കഞ്ചാവ് പിടികൂടിയത്.