ആലപ്പുഴ: വീട്ടുമുറ്റത്തെത്തിയ കറുത്ത പൂച്ച ഗൃഹനാഥന്റെ കാലിൽ കടിച്ചുപിടിച്ചു. വീട്ടുകാരും അയൽവാസികളും ശ്രമിച്ചിട്ടും പിടി വിടുവിക്കാൻ കഴിഞ്ഞില്ല. ചത്തിട്ടും വിടാത്ത പൂച്ചയുടെ പിടിത്തത്തിൽ നിന്നും അഗ്‌നിരക്ഷാസേനയെത്തിയാണ് ഗൃഹനാഥനെ രക്ഷിച്ചത്. ആലപ്പുഴ കൊറ്റംകുളങ്ങര വാർഡ് കാളാത്ത് തറയിൽ അനിലിനാണു കടിയേറ്റത്. വ്യാഴാഴ്ച രാത്രി ഒൻപതരയോടെയാണു സംഭവം.

വീട്ടുപടിക്കൽ കറുത്ത പൂച്ചയെ കണ്ടാണ് അനിൽ പുറത്തിറങ്ങിയത്. പെട്ടെന്ന് ഒരു പ്രകോപനവുമില്ലാതെ പൂച്ച ഓടിവന്ന് കാലിൽ കടിക്കുകയായിരുന്നുവെന്ന് അനിൽ പറഞ്ഞു. പിടിച്ചുമാറ്റാൻ ശ്രമിച്ചു. അപ്പോൾ കടിയുടെ പിടിത്തം കൂടി. വീട്ടുകാർ ഒച്ചവെച്ചതോടെ നാട്ടുകാർ ഓടിയെത്തി. എന്നിട്ടും, പൂച്ചയുടെ കടി വിടുവിക്കാനായില്ല.

ഒടുവിൽ, അഗ്‌നിരക്ഷാസേനയെത്തിയപ്പോഴേക്കും പൂച്ച ചത്തിരുന്നെങ്കിലും കാലിൽ നിന്നും പിടി വിട്ടിരുന്നില്ല. അഗ്‌നിരക്ഷാസേനയാണ് അനിലിനെ മോചിപ്പിച്ചത്. പൂച്ചയുടെ പല്ലുകൾ കാലിൽ ആഴ്ന്നിറങ്ങിയിരുന്നു. രാത്രിതന്നെ ആലപ്പുഴ ജനറൽ ആശുപത്രിയിലെത്തി പേവിഷപ്രതിരോധ കുത്തിവെപ്പെടുത്തു.

സാധാരണ പൂച്ചയെക്കാൾ നീളമുള്ള കറുത്ത പൂച്ചയാണ് കടിച്ചത്. ആലപ്പുഴ ജനറൽ ആശുപത്രിയിൽ കാളാത്ത് സ്വദേശിയായ യുവാവും വ്യാഴാഴ്ച വൈകുന്നേരം കറുത്ത പൂച്ചകടിച്ചതിനു കുത്തിവെപ്പെടുക്കാനെത്തിയിരുന്നു. നാടൻ പൂച്ചയാണെന്നു സ്ഥിരീകരിച്ചതായി വനംവകുപ്പ് അധികൃതർ പറഞ്ഞു.