കോട്ടയം: പെട്രോൾ പമ്പിൽനിന്ന് നിർത്തിയിട്ട ബസ് മോഷ്ടിച്ച് കടത്തിയ മൂവാറ്റുപുഴ തിരുമാറാടി സ്വദേശി പാറയിടുക്കിൽ രാഹുലി(36)നെ വെള്ളൂർ പൊലീസ് അറസ്റ്റ് ചെയ്തു. പെരുവ-എറണാകുളം റൂട്ടിൽ സർവീസ് നടത്തുന്ന ശ്രീഅയ്യപ്പൻ എന്ന ബസാണ് മോഷ്ടിച്ച് കടത്തിയത്. പെരുവയ്ക്ക് സമീപം വാടകയ്ക്ക് താമസിക്കുന്ന രാഹുൽ മറ്റൊരു സ്വകാര്യ ബസിലെ ഡ്രൈവറാണ്.

ശനിയാഴ്ച രാത്രിയിൽ സർവീസ് അവസാനിപ്പിച്ച് കുന്നപ്പിള്ളിയിലെ പെട്രോൾപമ്പിൽ നിർത്തിയിട്ടിരുന്ന ബസ് ഞായറാഴ്ച രാവിലെ ആറിന് സർവീസ് ആരംഭിക്കാൻ ജീവനക്കാർ എത്തിയപ്പോഴാണ് മോഷണംപോയ വിവരം അറിയുന്നത്. തുടർന്ന് വെള്ളൂർ പൊലീസിൽ ഉടമയും ജീവനക്കാരും ചേർന്ന് പരാതി നൽകുകയായിരുന്നു.

മോഷ്ടിച്ച ബസുമായി മൂവാറ്റുപുഴയിൽ എത്തിയ പ്രതി അവിടത്തെ ഒരു പെട്രോൾപമ്പിന് സമീപം വാഹനം ഉപേക്ഷിച്ചു. അവിടെ പാർക്ക് ചെയ്തിരുന്ന മറ്റൊരു ബസിലെ കണ്ടക്ടറുടെ ആറായിരം രൂപയും മൊബൈൽ ഫോണുമടങ്ങിയ ബാഗ് മോഷ്ടിച്ച് രാഹുൽ കടന്നുകളഞ്ഞു. മൊബൈൽ ഫോൺ കേന്ദ്രീകരിച്ച് നടത്തിയ അന്വേഷണത്തിൽ മൂവാറ്റുപുഴയിലെ ഒരു ബാറിൽനിന്ന് പ്രതിയെ പിടികൂടുകയായിരുന്നു.