തിരുവനന്തപുരം: കേരളത്തിൽ വരുംദിവസങ്ങളിൽ അതിതീവ്ര-തീവ്രമഴയ്ക്ക് സാധ്യതയെന്ന് കാലാവസ്ഥാവകുപ്പ്. ആറുജില്ലകൾക്ക് ശനിയാഴ്ച ഓറഞ്ച് മുന്നറിയിപ്പു നൽകിയിട്ടുണ്ട്. പടിഞ്ഞാറൻ കാറ്റ് ശക്തമായതാണ് മഴ കനക്കാൻ കാരണം. വടക്കൻ ജില്ലകളിലും ഇടുക്കിയിലുമാണ് കൂടുതൽ മഴയ്ക്ക് സാധ്യത. മൂന്നു ജില്ലകൾക്ക് ഞായറാഴ്ച ചുവപ്പു മുന്നറിയിപ്പും നൽകി.

ശനിയാഴ്ച ഇടുക്കി, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകൾക്കാണ് ഓറഞ്ച് മുന്നറിയിപ്പ്. ഇവിടങ്ങളിൽ 24 മണിക്കൂറിൽ 20 സെന്റീമീറ്റർവരെ മഴപെയ്യാം. കോഴിക്കോട്, വയനാട്, കണ്ണൂർ ജില്ലകളിലാണ് ഞായറാഴ്ച ചുവപ്പ് മുന്നറിയിപ്പ്. ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം, കാസർകോട് ജില്ലകളിൽ തിങ്കളാഴ്ച ഓറഞ്ച് മുന്നറിയിപ്പാണ്. മറ്റുജില്ലകൾക്ക് മഞ്ഞ മുന്നറിയിപ്പും.

കോഴിക്കോട്, കണ്ണൂർ, കാസർകോട് ജില്ലകളിൽ ചൊവ്വയും ബുധനും തീവ്രമഴ തുടരാനാണ് സാധ്യത. കേരളം, കർണാടക, ലക്ഷദ്വീപ് തീരങ്ങളിൽ 25വരെ മീൻപിടിത്തം വിലക്കി.