തൃശ്ശൂർ: റോഡ് മോശമായതിനാൽ മുഖ്യമന്ത്രിക്ക് വഴിമാറി പോകേണ്ടിവന്നത് വാർത്തയായതിന് പിന്നാലെ കേച്ചേരി-കുന്നംകുളം റോഡിലെ കുഴിയടയ്ക്കാനുള്ള പണി തുടങ്ങി. മഴയത്ത് ചെല്ലി കൊണ്ടുവന്നു തൽക്കാലം കുഴി നിവർത്തി. എന്നാൽ പിന്നാലെ ശക്തമായി മഴ പെയ്തു. മഴ മാറുന്ന മുറയ്ക്ക് ടാർ ചെയ്യാനാണ് തീരുമാനം. അടുത്ത കൊല്ലം ഓഗസ്റ്റോടെ കേച്ചേരി ഉൾപ്പെടുന്ന തൃശൂർ-കുറ്റിപ്പുറം റോഡ് പൂർത്തിയാക്കാൻ പൊതു മരാമത്ത് വകുപ്പ് മന്ത്രി വിളിച്ച യോഗത്തിൽ തീരുമാനമായി.

കുഴി കൊണ്ടു പൊറുതിമുട്ടിയ റോഡാണ് കേച്ചേരിയിലേത്. കോഴിക്കോട് നിന്ന് തൃശ്ശൂരിലേക്കുള്ള യാത്രക്കിടെയാണ് കുന്നംകുളം റോഡ് ഒഴിവാക്കി വടക്കാഞ്ചേരി വഴി മുഖ്യമന്ത്രി സഞ്ചരിച്ചത്. സംഭവം സർക്കാരിന് വലിയ നാണക്കേടാണ് ഉണ്ടാക്കിയത്. പ്രതിഷേധങ്ങളും വാർത്തയും വന്നതോടെ കുഴിയടയ്ക്കാനുള്ള നടപടികൾ ആരംഭിക്കുകയായിരുന്നു. പെരുമഴ പെയ്യുമ്പോഴും റോഡിൽ ചെല്ലിതട്ടി കുഴിയടയ്ക്കാനുള്ള പണിയാണ് പൊതുമരാമത്ത് വകുപ്പ് തുടങ്ങിയത്.

ചെല്ലി തട്ടിയിട്ട് കുഴിയടച്ചെങ്കിലും മഴ പെയ്യുന്നതിനാൽ ടാറിടുന്നത് വൈകും. അതിനിടെ തൃശൂർ ജില്ലയിലെ നിത്യ തലവേദനായ രണ്ട് റോഡുകളുടെ പണി വേഗത്തിലാക്കാൻ പൊതു മരാമത്ത് മന്ത്രി വിളിച്ച ഉന്നത തല യോഗം തീരുമാനിച്ചു. കൊടുങ്ങല്ലൂർ തൃശൂർ പാതയുടെ നിർമ്മാണം അടുത്ത ഒക്ടോബറിൽ തീർക്കും. തൃശൂർ കുറ്റിപ്പുറം പാതയുടെ റീടെണ്ടർ ഓഗസ്റ്റ് ഒന്നിനു മുമ്പ്. അടുത്ത കൊല്ലം ഓഗസ്റ്റോടെ പണി തീർക്കും. അതുവരെ റോഡ് ഗതാഗത യോഗ്യമാക്കുന്നതിന് ഇപ്പോൾ അനുവദിച്ച 29 ലക്ഷം പോരാതെ വന്നാൽ കൂടുതൽ പണം അനുവദിക്കാനും തീരുമാനമായി.