തിരുവനന്തപുരം: മുല്ലപ്പെരിയാറിൽ ഉൾപ്പെടെ ഒമ്പതു പുതിയ ഡാമുകൾ നിർമ്മിക്കാൻ പദ്ധതിയുണ്ടെന്ന് മന്ത്രി റോഷി അഗസ്റ്റിൻ നിയമസഭയെ അറിയിച്ചു. 129 വർഷം പഴക്കമുള്ള മുല്ലപ്പെരിയാർ ഡാമിന്റെ സുരക്ഷ മുൻ നിർത്തിയാണ് പുതിയ അണക്കെട്ട് നിർമ്മിക്കാൻ നീക്കം നടത്തുന്നത്. ഇതിന് ഡി.പി.ആർ തയാറാക്കിയിട്ടുണ്ട്. കേന്ദ്ര സർക്കാറിന്റെ പാരിസ്ഥിതിക ആഘാത പഠനത്തിനായുള്ള അനുമതിക്കായി ശ്രമം തുടരുന്നു.

തമിഴ്‌നാടിന് ജലവും കേരളത്തിന് സുരക്ഷയും എന്നതാണ് ഈ വിഷയത്തിൽ കേരളത്തിന്റെ നയമെന്നും മന്ത്രി വ്യക്തമാക്കി. പെരിയാർ, ചാലക്കുടി, ചാലിയാർ, പമ്പ- അച്ചൻകോവിൽ, മീനച്ചിൽ നദീതടങ്ങളിൽ പ്രളയ പ്രതിരോധ ഡാമുകൾ നിർമ്മിക്കാനും നടപടി തുടങ്ങി. ഇതിൽ മൂന്നു ഡാമുകളുടെ പഠനം പൂർത്തിയാക്കിയതായും മന്ത്രി വ്യക്തമാക്കി.

കാവേരി ട്രിബ്യൂണൽ ഉത്തരവ് പ്രകാരം പാമ്പാർ സബ് ബേസിനിൽ മൂന്നു പദ്ധതികളിലായി മുന്ന് ഡാമുകൾക്കുവേണ്ടി തൃശൂർ ഫീൽഡ് സ്റ്റഡി സർക്കിൾ പഠനം നടത്തിയിട്ടുണ്ട്. പാമ്പാർ നദീതടത്തിൽനിന്ന് കേരളത്തിന് അനുവദിച്ച മൂന്ന് ടി.എം.സി ജലം ഫലപ്രദമായി ഉപയോഗിക്കുന്നതിനായി പാമ്പാർ സബ് ബേസിനിൽ ചെങ്കല്ലാർ പദ്ധതിയിൽ ഉൾപ്പെടുത്തി പട്ടിശ്ശേരി ഡാം, തലയാർ പദ്ധതിയിൽ ഉൾപ്പെടുത്തി ലോവർ ചട്ട മൂന്നാർ ഡാം, വട്ടവട പദ്ധതിയിൽ ഉൾപ്പെടുത്തി ഒറ്റമരം ഡാം എന്നീ മൂന്നു ഡാമുകൾ നിർമ്മിക്കാൻ ആലോചനയുണ്ടെന്നും മന്ത്രി അറിയിച്ചു.

കാവേരി ട്രിബ്യൂണൽ ഉത്തരവ് പ്രകാരം ഭവാനി ബേസിനിൽ അനുവദിച്ച ആറ് ടി.എം.സി ജലത്തിൽ നിന്ന് 2.87 ടി.എം.സി ജലം ഉപയോഗിക്കുന്നതിനായി അട്ടപ്പാടി- ചിറ്റൂരിൽ ശിരുവാണി പുഴക്ക് കുറുകേ ഡാം നിർമ്മിക്കുന്നതിന്? പഠനം നടത്തിയിട്ടുണ്ട്. ചാലക്കുടി പുഴയുടെ പോഷക നദിയായ കാരപ്പാറയിൽ അണക്കെട്ട് നിർമ്മിക്കാനുള്ള പദ്ധതിയാണ് മറ്റൊന്ന് 2019 ലെ പ്രളയത്തിൽ കൂടുതൽ നാശനഷ്ടം നേരിട്ട മലപ്പുറം പോത്തുകല്ല് പഞ്ചായത്തിലെ അമ്പിട്ടാൻപൊട്ടിയിൽ പ്രളയ നിയന്ത്രണ അണക്കെട്ടിന്റെ സാധ്യതാപഠനത്തിനായുള്ള നിർദ്ദേശം സംസ്ഥാന ദുരന്തനിവാരണ അഥോറിറ്റിയുടെ പരിഗണനയിലാണെന്നും മന്ത്രി കൂട്ടിച്ചേർത്തു.