മലപ്പുറം: പ്രണയം നടിച്ച് പ്രലോഭിപ്പിച്ച് പ്രായപൂർത്തിയാകാത്ത പെൺകുട്ടികളെ പീഡിപ്പിച്ച വ്യത്യസ്ത സംഭവത്തിൽ രണ്ടു യുവാക്കളെ നിലമ്പൂർ പൊലീസ് അറസ്റ്റ് ചെയ്തു.

അരീക്കോട് സ്വദേശി വടക്കയിൽ മുഹമ്മദ് യൂനസ് (26) മമ്പാട് സ്വദേശി റംഷീദ് (27) എന്നിവരെയാണ് നിലമ്പൂർ സിഐ. പി. വിഷ്ണു, എസ്‌ഐ. ടി.എം. സജിനി എന്നിവരുടെ നേതൃത്വത്തിലുള്ള പൊലീസ് സംഘം അറസ്റ്റ് ചെയ്തത്. രണ്ടു സംഭവങ്ങളിലഉം 16 വയസുള്ള പെൺകുട്ടികളെയാണ് പീഡിപ്പിച്ചത്. ചൈൽഡ് വെൽഫെയർ കമ്മിറ്റി (സി.ഡബ്ല്യു.സി.) മുൻപാകെ വന്ന പരാതി നിലമ്പൂർ പൊലീസിന് കൈമാറുകയായിരുന്നു. തുടർന്ന് നടത്തിയ അന്വേഷണത്തിലാണ് പ്രതികളെ പിടികൂടിയത്.

അതേ സമയം അർദ്ധരാത്രി വീട്ടിലെത്തി പതിനഞ്ചുകാരിയെ ബൈക്കിൽ വിവിധയിടങ്ങളിൽ കൊണ്ടുപോയി മാനഭംഗപ്പെടുത്തിയെന്ന കേസിൽ 21കാരന്റെ ജാമ്യാപേക്ഷ മഞ്ചേരി പോക്‌സോ സ്‌പെഷ്യൽ കോടതി തള്ളി. മലപ്പുറം എൻ കെ പടി വെസ്റ്റ് കോഡൂർ കടക്കാടൻ ഫഹദ് (21)ന്റെ ജാമ്യാപേക്ഷയാണ് ജഡ്ജി എസ് നസീറ തള്ളിയത്. 2023 ജനുവരി എട്ടിന് രാത്രി 12 മണിക്ക് പരാതിക്കാരിയുടെ വീട്ടിൽ ബൈക്കിലെത്തിയ യുവാവ് പെൺകുട്ടിയെ തിരൂർ ബീച്ചിലും കൊളായിയിലും കൊണ്ടുപോയി മാനഭംഗപ്പെടുത്തിയ ശേഷം പുലർച്ചെ വീട്ടിൽ തിരിച്ചു കൊണ്ടാക്കിയെന്നാണ് കേസ്.

ജനുവരി നാലിനും രാത്രി 12 മണിക്ക് പ്രതി കുട്ടിയെ വീട്ടിൽ നിന്നും കൊണ്ടു പോയതായും പരാതിയിലുണ്ട്. പരാതിയെ തുടർന്ന് ജനുവരി 27ന് മലപ്പുറം വനിതാസെൽ പൊലീസാണ് പ്രതിയെ അറസ്റ്റ് ചെയ്തത്.

(ദുഃഖവെള്ളി പ്രമാണിച്ച് ഓഫീസിന് (7.4.2023) അവധി ആയതിനാൽ മറുനാടൻ മലയാളി നാളെ അപ്‌ഡേറ്റ് ചെയ്യുന്നതല്ല - എഡിറ്റർ)

ജംഷാദ് മലപ്പുറം

    മറുനാടന്‍ മലയാളി ന്യൂസ് കോണ്‍ട്രിബ്യൂട്ടര്‍