നെല്ല് സംഭരണം: തുക നാളെ മുതൽ വിതരണം ചെയ്യും; പണം വിതരണം ചെയ്യുന്നത് പിആർഎസ് വായ്പയായി

തിരുവനന്തപുരം: നടപ്പു സീസണിൽ സപ്ലൈകോ നെല്ല്സംഭരിച്ച വകയിൽ കർഷകർക്ക് നൽകാനുള്ള തുക തിങ്കളാഴ്ച വിതരണം ചെയ്ത് തുടങ്ങും. ഇതിനകം 23500 മെട്രിക് ടൺ നെല്ല് സംഭരിച്ചു. ആലപ്പുഴയിലും പാലക്കാട്ടും കോട്ടയത്തും മികച്ച നിലയിലാണ് നെല്ല് സംഭരണം പുരോഗമിക്കുന്നത്.

സംഭരണവില പിആർഎസ് വായ്പയായി എസ്‌ബിഐ, കനറാ ബാങ്ക്, ഫെഡറൽ ബാങ്ക് എന്നിവ വഴിയാണ് വിതരണം ചെയ്യുക. കർഷകരാണ് വായ്പ എടുക്കുന്നതെങ്കിലും തുകയും പലിശയും പിഴ പലിശ ഉണ്ടായാൽ അതും സപ്ലൈകോ പൂർണമായും അടച്ചുതീർക്കും. കർഷകന് ഇക്കാര്യത്തിൽ ബാധ്യതയുണ്ടാകില്ല. സപ്ലൈകോയ്ക്കും സർക്കാരിനുമാണ് പൂർണമായ ഉത്തരവാദിത്തം.കഴിഞ്ഞ സീസണിൽ 2,50,373 കർഷകരിൽ നിന്നായി 7.31 ലക്ഷം മെട്രിക് ടൺ നെല്ല് സംഭരിച്ചിരുന്നു.

കുട്ടനാട്ടിൽ സെപ്റ്റംബർ 26 നും പാലക്കാട് ഒക്ടോബർ അഞ്ചിനുമാണ് നെല്ല്സംഭരണം ആരംഭിച്ചു. 11 മില്ലുകൾ നെല്ല് സംഭരണ പ്രവർത്തനങ്ങളുമായി സഹകരിക്കുന്നു. സംസ്ഥാാന പ്രോത്സാഹന ബോണസ് ഇനത്തിൽ 200 കോടി അനുവദിച്ചിട്ടുണ്ട്. ബാങ്കുകളിൽ നിന്നും പിആർഎസ് വായ്പയായി 170 കോടിയും ലഭ്യമാക്കാൻ കഴിയും.