തിരുവനന്തപുരം: മുഖ്യമന്ത്രി പിണറായി വിജയന് ഇന്ന് 78 ആം പിറന്നാൾ. പതിവ് പോലെ ആഘോഷങ്ങൾ ഒന്നുമില്ലാതെയാണ് മുഖ്യമന്ത്രിക്ക് പിറന്നാൾ ദിനം. രാവിലെ മന്ത്രിസഭാ യോഗവും പിന്നീട് ചില പൊതുപരിപാടികളും തലസ്ഥാനത്തുണ്ട്.

ഔദ്യോഗിക രേഖകൾ പ്രകാരം 1945 മാർച്ച് 21നാണ് പിണറായി വിജയന്റെ പിറന്നാൾ. എന്നാൽ യഥാർത്ഥ ജന്മദിനം 1945 മെയ് 24 എന്ന് പിണറായി വിജയൻ തന്നെയായിരുന്നു അറിയിച്ചത്. 2016ൽ ഒന്നാം പിണറായി സർക്കാർ സത്യപ്രതിജ്ഞ ചെയ്യുന്നതിന്റെ തലേ ദിവസമായിരുന്നു പിറന്നാൾ ദിനത്തിലെ സസ്‌പെൻസ് പിണറായി അവസാനിപ്പിച്ചത്. പിണറായി മുഖ്യമന്ത്രിയായി അധികാരത്തിലെത്തിയിട്ട് നാളെ 7 വർഷം പൂർത്തിയാകുകയാണ്.

നടൻ മമ്മൂട്ടിയടക്കം നിരവധി പേർ മുഖ്യമന്ത്രിക്ക് പിറന്നാൾ ആശംസ നേർന്നു. 'ബഹുമാനപ്പെട്ട മുഖ്യമന്ത്രി പിണറായി വിജയന് ഹൃദയം നിറഞ്ഞ ജന്മദിനാശംസകൾ നേരുന്നു' എന്നാണ് മമ്മൂട്ടി ഫേസ്‌ബുക്കിൽ കുറിച്ചത്. മന്ത്രി മുഹമ്മദ് റിയാസും ആശംസകൾ നേർന്നു. മുഖ്യമന്ത്രി പക്ഷിയെ കളിപ്പിക്കുന്ന ചിത്രം സഹിതമാണ് മുഹമ്മദ് റിയാസ് ആശംസകൾ നേർന്നത്. കരുത്തോടെ നേരുകാക്കുന്ന സഖാവിന് ജന്മദിനാശംസകൾ എന്നാണ് മന്ത്രി കുറിച്ചത്.

ആശംസകൾപിണറായി വിജയൻപിറന്നാൾ

മറുനാടന്‍ മലയാളി

    മറുനാടന്‍ മലയാളി ബ്യൂറോ