മലപ്പുറം: മലപ്പുറത്ത് പതിനാറുകാരിയെ പീഡിപ്പിച്ച് ഗർണിയാക്കിയ കേസിൽ 24 കാരൻ അറസ്റ്റിൽ. മാനസികാസ്വസ്ഥതയുള്ള പ്രായപൂർത്തിയാകാത്ത പെൺകുട്ടി ഗർഭിണിയായ സംഭവത്തിൽ യുവാവിനെ മലപ്പുറം വനിതാ സെൽ പൊലീസാണ് അറസ്റ്റ് ചെയ്തത്. കൂട്ടിലങ്ങാടി ചെണ്ടക്കോട് പഴമള്ളൂർ പാറക്കൽ ഷഹൻഷാൻ (24)നെയാണ് അറസ്റ്റ് ചെയ്തത്.

ഒരു വർഷം മുമ്പ് മലപ്പുറം കോട്ടക്കുന്നിൽ വെച്ച് പരിചയപ്പെട്ട പതിനാറുകാരിയുമായി പ്രതി പ്രണയത്തിലാവുകയായിരുന്നു. ഇക്കഴിഞ്ഞ ഓഗസ്റ്റ് 18ന് മലപ്പുറത്തു നിന്നും കണ്ടുമുട്ടിയ പെൺകുട്ടിയെ പ്രതി ബസ്സിൽ മഞ്ചേരിയിലേക്ക് കൊണ്ടു പോകുകയും കച്ചേരിപ്പടിയിലെ ഒഴിഞ്ഞ കെട്ടിടത്തിൽ വെച്ച് ലൈംഗിക പീഡനത്തിന് വിധേയക്കുകയുമായിരുന്നു.

കുട്ടി ഗർഭിണിയായതോടെയാണ് പീഡന വിവരം പുറത്തായത്. പെൺകുട്ടിയുടെ വീട്ടുകാർ പരാതി നൽകിയതിന്റെ അടിസ്ഥാനത്തിൽ മലപ്പുറം ചൈൽഡ് ലൈൻ നിർദ്ദേശപ്രകാരം പൊലീസ് സെപ്റ്റംബർ 25ന് കേസ് രജിസ്റ്റർ ചെയ്യുകയായിരുന്നു. അറസ്റ്റിലായ പ്രതിയെ മലപ്പുറം ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതി 14 ദിവസത്തേക്ക് റിമാന്റ് ചെയ്തു.