പതിനഞ്ചുകാരിയെ പീഡിപ്പിച്ചെന്ന് പരാതി; പോക്സോ കേസിൽ രണ്ടുമാസത്തിന് ശേഷം എലത്തൂർ സ്വദേശിനി അറസ്റ്റിൽ

കോഴിക്കോട്: പതിനഞ്ചുകാരിയെ പീഡിപ്പിച്ചെന്ന പരാതിയിൽ യുവതി രണ്ടുമാസത്തിന് ശേഷം അറസ്റ്റിൽ. വിദേശത്തുനിന്ന് നാട്ടിലെത്തിയപ്പോഴാണ് എലത്തൂർ ചെറുകുളം ജസ്‌ന (22) യെ പോക്‌സോ കേസിൽ ചേവായൂർ പൊലീസ് അറസ്റ്റ് ചെയ്തത്.

ജസ്‌ന പീഡിപ്പിച്ചതായുള്ള പതിനഞ്ചുകാരിയുടെ പരാതിയിൽ ഡിസംബർ 29-നാണ് പൊലീസ് കേസെടുത്തത്. രണ്ടുദിവസം മുമ്പാണ് ഇവർ നാട്ടിലെത്തിയതായി പൊലീസിന് വിവരം ലഭിച്ചത്.

ജസ്‌നയെ വൈദ്യപരിശോധനയ്ക്കുശേഷം കോടതിയിൽ ഹാജരാക്കി 14 ദിവസത്തേക്ക് റിമാൻഡ് ചെയ്തു. എസ്‌ഐ. വിനയന്റെ നേതൃത്വത്തിൽ സിവിൽ പൊലീസ് ഓഫീസർമാരായ ശ്രീരാജ്, മഞ്ജു എന്നിവരാണ് പ്രതിയെ അറസ്റ്റ് ചെയ്തത്.