കൊച്ചിയിൽ പെൺകുട്ടിയെ കുറ്റിക്കാട്ടിലെത്തിച്ച് പീഡിപ്പിച്ചു; ഇൻസ്റ്റഗ്രാം സുഹൃത്തുക്കൾ പിടിയിൽ

കൊച്ചി: ഇൻസ്റ്റഗ്രാം വഴി പരിചയപ്പെട്ട പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിൽ യുവാക്കൾ പിടിയിൽ. പുതുവൈപ്പ് സൂര്യ പെട്രോൾ പമ്പിനു സമീപം തെക്കെതെരുവിൽ വീട്ടിൽ താമസിക്കുന്ന നോർത്ത് പറവൂർ പെരുമ്പടന്ന കോട്ടക്കണക്കം പറമ്പിൽ ബിബിൻ (25), സുഹൃത്ത് പുതുവൈപ്പ് മുരിക്കുംപാടം പഴമയിൽ വീട്ടിൽ ജീവൻ (21) എന്നിവരെയാണ് മുളവുകാട് പൊലീസ് അറ്‌സറ്റു ചെയ്തത്.

ബിബിൻ ആണ് ആദ്യം പെൺകുട്ടിയെ ഇൻസ്റ്റഗ്രാം വഴി പരിചയപ്പെട്ടത്. തുടർന്ന് കുട്ടിയെ ഭീഷണിപ്പെടുത്തി പുതുവൈപ്പ് എൽ.എൻ.ജി. ഭാഗത്തുള്ള കുറ്റിക്കാട്ടിലെത്തിച്ച് പീഡിപ്പിക്കുകയായിരുന്നു. സുഹൃത്തായ ജീവൻ മറ്റൊരു ഐ.ഡി.യിലൂടെ കുട്ടിയെ പരിചയപ്പെടുകയും ബിബിൻ പീഡിപ്പിച്ച വിവരം വീട്ടിൽ അറിയിക്കുമെന്ന് ഭീഷണിപ്പെടുത്തി അതേ സ്ഥലത്തുെവച്ച് പീഡിപ്പിക്കുകയും ചെയ്തു.

ചൈൽഡ് ഹെൽപ്പ് ലൈനിൽനിന്നു ലഭിച്ച വിവരപ്രകാരം കേസ് രജിസ്റ്റർ ചെയ്ത പൊലീസ് പ്രതികളെ സ്വന്തം വീടുകളിൽനിന്ന് അറസ്റ്റ് ചെയ്യുകയായിരുന്നു. ജീവൻ ഞാറയ്ക്കൽ, മുളവുകാട് സ്റ്റേഷനുകളിൽ അതിക്രമ കേസുകളിലും മയക്കുമരുന്ന് കേസുകളിലും പ്രതിയാണ്. മുളവുകാട് എസ്.എച്ച്.ഒ. മൻജിത് ലാലിന്റെ നേതൃത്വത്തിൽ എസ്‌ഐ. സുനേഖ് ജെയിംസ്, എഎസ്ഐ. ഗോപകുമാർ എന്നിവരാണ് അന്വേഷണ സംഘത്തിൽ ഉണ്ടായിരുന്നത്. പ്രതികളെ കോടതിയിൽ ഹാജരാക്കി.