ആശുപത്രിയിലെ ലിഫ്റ്റിൽ 10വയസുകാരിയെ പീഡിപ്പിക്കാൻ ശ്രമം; 53കാരൻ പിടിയിൽ
കാസർഗോഡ്: കുമ്പളയിൽ പത്തു വയസുകാരിയെ ആശുപത്രിയിലെ ലിഫ്റ്റിനകത്ത് പീഡിപ്പിക്കാൻ ശ്രമിച്ചയാളെ അറസ്റ്റ് ചെയ്തു. നീർച്ചാൽ പെർഡാല സ്വദേശി 53 വയസുകാരനായ മുഹമ്മദിനെയാണ് കുമ്പള ഇൻസ്പെക്ടറുടെ നേതൃത്വത്തിൽ അറസ്റ്റ് ചെയ്തത്.
കുമ്പളയിലെ ആശുപത്രിയിൽ മാതാവിനൊപ്പം ഡോക്ടറെ കാണാൻ എത്തിയ പത്തു വയസുകാരിക്ക് നേരെയാണ് മധ്യവയസ്‌കന്റെ പീഡന ശ്രമമുണ്ടായത്. മാതാവ് മരുന്നു വാങ്ങാൻ പോയ സമയത്ത് പെൺകുട്ടിയുടെ അടുത്തെത്തിയ ഇയാൾ ലിഫ്റ്റ് കാണിച്ചു തരാമെന്ന് പറഞ്ഞ് കൂട്ടിക്കൊണ്ട് പോവുകയായിരുന്നു. തുടർന്ന് പീഡിപ്പിക്കാൻ ശ്രമിക്കുകയായിരുന്നുവെന്ന് പരാതിയിൽ പറയുന്നു.
മാതാവ് മരുന്നു വാങ്ങി തിരികെ എത്തിയപ്പോൾ മകളെ കണ്ടില്ല. തുടർന്ന് നടത്തിയ അന്വേഷണത്തിലാണ് ലിഫ്റ്റിനു സമീപത്തു കുട്ടിയെ കണ്ടത്. പെൺകുട്ടി തനിക്കുണ്ടായ ദുരനുഭവം മാതാവിനോട് പറഞ്ഞതോടെ പൊലീസിൽ പരാതി നൽകുകയായിരുന്നു.
കുമ്പള പൊലീസ് സിസി ടിവി ദൃശ്യങ്ങൾ അടക്കം ശേഖരിച്ച് നടത്തിയ അന്വേഷണത്തിലാണ് പ്രതിയെ പിടികൂടിയത്. പോക്സോ, തട്ടിക്കൊണ്ട് പോകൽ വകുപ്പുകൾ ചുമത്തിയ പ്രതിയെ കോടതിയിൽ ഹാജരാക്കി റിമാന്റ് ചെയ്തു.
