ഗാന്ധിയെ കൊന്നത് ആർഎസ്എസ് എന്ന പരാമർശം; രാഹുൽ മാങ്കൂട്ടത്തിലിനും തമിഴ് എഴുത്തുകാരി സൽമയ്ക്കും വക്കീൽ നോട്ടീസ് അയച്ച് ആർഎസ്എസ്

തിരുവനന്തപുരം: യൂത്ത് കോൺഗ്രസ് സംസ്ഥാന അധ്യക്ഷൻ രാഹുൽ മാങ്കൂട്ടത്തിലിനും തമിഴ് എഴുത്തുകാരി സൽമക്കും വക്കീൽ നോട്ടീസയച്ച് ആർഎസ്എസ്. കഴിഞ്ഞ മാസം 30 ന് യൂത്ത് കോൺഗ്രസ് മലപ്പുറം ജില്ലാ കമ്മിറ്റി സംഘടിപ്പിച്ച 'ഗാന്ധിയെ കൊന്നത് ആർഎസ്എസ്, ഫാസിസ്റ്റ് വിരുദ്ധ സംഗമം' പരിപാടിയിൽ സംസാരിച്ചതിനാണ് വക്കീൽ നോട്ടീസ് അയച്ചിരിക്കുന്നത്. മലപ്പുറം ആർഎസ്എസ് സഹ കാര്യ വാഹക് കൃഷ്ണകുമാർ ആണ് നോട്ടീസ് അയച്ചത്.

ഗാന്ധിയെ കൊന്നത് ആർഎസ്എസ് എന്ന് പറഞ്ഞതിന് മാപ്പ് പറയണം എന്നാണ് വക്കീൽ നോട്ടീസിലെ ആവശ്യം. ജനുവരി മുപ്പതിന് മലപ്പുറത്ത് ആയിരുന്നു യൂത്ത് കോൺഗ്രസ് പരിപാടി സംഘടിപ്പിച്ചത്.

ഗാന്ധിയെ കൊന്നത് ആർഎസ്എസ് തന്നെയാണെന്ന് ഒരായിരം തവണ കോൺഗ്രസ് ഉറക്കെ വിളിച്ചു പറയുമെന്ന് രാഹുൽ മാങ്കൂട്ടത്തിൽ പരിപാടിയിൽ പറഞ്ഞിരുന്നു. ശരീരത്തെ കാർന്നു തിന്നുന്ന വൈറസുകളെ പോലെ രാജ്യത്തെ നശിപ്പിക്കുന്ന ഭീകരമായ വൈറസാണ് ആർഎസ്എസ് എന്നാണ് തമിഴ് എഴുത്തുകാരിയും ഡിഎംകെ വക്താവുമായ സൽമ പരിപാടിയിൽ പറഞ്ഞത്.