തിരുവനന്തപുരം: അയോധ്യ രാമക്ഷേത്ര പ്രാണ പ്രതിഷ്ഠാ ദിനത്തിൽ രാംലല്ലയുടെ ചിത്രം ഫേസ്‌ബുക്കിൽ പോസ്റ്റ് ചെയ്ത് കോൺഗ്രസ് എംപി ശശി തരൂർ. ' സീയാവർ രാമചന്ദ്ര കീ ജയ്' (Hail Ramchandra to Siyavar ) എന്ന് കുറിച്ചു കൊണ്ടാണ് ശശി തരൂർ രാമവിഗ്രഹത്തിന്റെ ചിത്രം പങ്കുവെച്ചത്.

അയോധ്യയിലെ രാമക്ഷേത്ര പ്രതിഷ്ഠയെ ബിജെപി രാഷ്ട്രീയമായി ഉപയോഗിക്കുകയാണെന്നും അതുകൊണ്ടാണ് കോൺഗ്രസ് ആ ചടങ്ങിൽ പങ്കെടുക്കില്ലെന്ന് അറിയിച്ചതെന്നും ശശി തരൂർ കഴിഞ്ഞ ദിവസം പ്രതികരിച്ചിരുന്നു. 'ഞാൻ ക്ഷേത്രങ്ങളിൽ പോകുന്നതിനു വലിയ പ്രചാരണം നൽകാറില്ല. അവരവരുടെ വിശ്വാസത്തിൽ എല്ലാവർക്കും പൂർണ അധികാരമുണ്ട്. മറ്റവസരങ്ങളിൽ കോൺഗ്രസ് നേതാക്കൾ അയോധ്യ ഉൾപ്പെടെ പല ക്ഷേത്രങ്ങളിലും പോകും അവസരം ലഭിക്കുമ്പോൾ ഞാനും അയോധ്യയിൽ പോകുമായിരിക്കും. ഞാൻ ക്ഷേത്രത്തിൽ പോകുന്നതു പ്രാർത്ഥിക്കാനാണ്, രാഷ്ട്രീയം കളിക്കാനല്ല. എല്ലാ വ്യക്തികൾക്കും ദൈവവുമായുള്ള ബന്ധം സ്വകാര്യ വിശ്വാസമാണ്. ഞാൻ ആരുടെയും വിശ്വാസത്തെ കുറ്റംപറയില്ല. എന്റെ വിശ്വാസം എന്റെ സ്വകാര്യ വിഷയമാണ് ' ശശി തരൂർ എംപി പറഞ്ഞു.