കലോത്സവ ഉദ്ഘാടനത്തിനിടെ അദ്ധ്യാപകർ സംസാരിച്ചപ്പോൾ സ്പീക്കർക്ക് അനിഷ്ടം; പ്രസംഗം നിർത്തി ഇറങ്ങിപ്പോയി സ്പീക്കർ എ.എൻ. ഷംസീർ

കോഴിക്കോട്: ഉദ്ഘാടനത്തിനിടെ സദസ്സിൽ നിന്ന് അദ്ധ്യാപകർ സംസാരിച്ചതിനു പിണങ്ങി സ്പീക്കർ എ എൻ ഷംസീർ. പരിഭവം മറച്ചുവെക്കാതെ ഇറങ്ങിപോയി സ്പീക്കർ. കോഴിക്കോട് ജില്ലാ സ്‌കൂൾ കലോത്സവത്തിന്റെ ഉദ്ഘാടന ചടങ്ങിനിടെയാണ് സംഭവം.

ഉദ്ഘാട്‌ന പ്രസംഗത്തിനിടെയിൽ അദ്ധ്യാപകർ സംസാരിച്ചതോടെ പ്രകോപിതനായ എ.എൻ. ഷംസീർ പ്രസംഗം അവസാനിപ്പിച്ചു മടങ്ങുകയായിരുന്നു. കുട്ടികൾ പ്രസംഗം കേൾക്കുന്നുണ്ട്, എന്നാൽ അദ്ധ്യാപകരാണ് ഇരുന്ന് സംസാരിക്കുന്നത്. ഇതുകൊണ്ട് താൻ പ്രസംഗം അവസാനിപ്പിക്കുകയാണ് എന്ന് പറഞ്ഞ് ഇറങ്ങിപോകുകയായിരുന്നു.

സ്പീക്കറുടെ വാക്കുകൾ: 'ഞാൻ ദീർഘിപ്പിക്കുന്നില്ല, കാരണം ആളുകൾ സ്പീക്കർ പ്രസംഗിക്കുമ്പോൾ അവിടെ കിസ പറഞ്ഞിരിക്കുകയാണ്. ഇത് പിന്നെ ഞാൻ ആരോട് പ്രസംഗിക്കാനാ?അതുകൊണ്ട് ചെയ്യാൻ പറ്റുന്ന കാര്യം പ്രസംഗം ചുരുക്കുക എന്നതാണ്. മറ്റ് കാര്യങ്ങളിലേക്ക് ഒന്നും കടന്നുപോകാതെ, ശരിക്കും ഇപ്പോൾ കുട്ടികൾ ശ്രദ്ധിക്കുന്നുണ്ട്, അദ്ധ്യാപകരാ ശ്രദ്ധിക്കാത്തെ. അതിനേക്കാൾ നല്ലത് പ്രസംഗം നിർത്തുന്നതാണല്ലോ'.