തിരുവനന്തപുരം: ശശി തരൂരിനെ കുറിച്ച് ബിജെപി നേതാവ് ഒ. രാജഗോപാൽ പറഞ്ഞത് സത്യമാണെന്ന് പ്രതിപക്ഷ നേതാവ് വിഡി സതീശൻ. ശശി തരൂർ തിരുവനന്തപുരത്തെ ജനങ്ങൾ ഹൃദയത്തിലേറ്റിയ ജനപ്രതിനിധിയാണ്. കഴിഞ്ഞ തവണ വിജയിച്ചതിനേക്കാൾ വലിയ ഭൂരിപക്ഷത്തിന് അദ്ദേഹം വിജയിക്കും. ആ യാഥാർത്ഥ്യം ബിജെപിയുടെ സമുന്നത നേതാക്കൾക്ക് പോലും മനസിലായെന്നതിൽ സന്തോഷമുണ്ട്.

കേരളത്തിൽ ബിജെപി ഒരിക്കലും വിജയിക്കില്ല. ഭിന്നിപ്പുണ്ടാക്കാനാണ് ബിജെപി ശ്രമിക്കുന്നത്. അതിന് ഞങ്ങൾ അനുവദിക്കില്ല. തൃശൂരിൽ കഴിഞ്ഞ തവണ ടി.എൻ പ്രതാപൻ വിജയിച്ചതിനേക്കാൾ വലിയ ഭൂരിപക്ഷത്തിന് യു.ഡി.എഫ് സ്ഥാനാർത്ഥി വിജയിക്കും. വനിതാ ഗുസ്തി താരങ്ങളുടെ കണ്ണീരിൽ ചവിട്ടിയാണ് പ്രധാനമന്ത്രി കേരളത്തിൽ വന്ന് നാരീശക്തിയെ കുറിച്ച് പറഞ്ഞത്. നാട് മുഴുവൻ സ്ത്രീകൾ വേട്ടയാടപ്പെടുകയാണ്. ഇതെല്ലാം ബിജെപിയുടെ നാടകമാണ്. ഇതൊന്നും മതേതര കേരളത്തിൽ വിലപ്പോകില്ല-സതീശൻ കൂട്ടിച്ചേർത്തു.