സ്‌കൂൾ കുട്ടികളുമായി പോയ ഓട്ടോറിക്ഷ മറിഞ്ഞ് വനിതാ ഓട്ടോഡ്രൈവർ മരിച്ചു; നാല് കുട്ടികൾക്കും പരിക്ക്; സംഭവം പത്തനംതിട്ട ചിറ്റാറിൽ

പത്തനംതിട്ട: സ്‌കൂൾ കുട്ടികളുമായി പോയ ഓട്ടോറിക്ഷ നിയന്ത്രണം വിട്ടു മറിഞ്ഞ് വനിതാഡ്രൈവർ മരിച്ചു. നാലു കുട്ടികൾക്ക് പരുക്കേറ്റു. ചിറ്റാർ കൊടുമുടി തൈക്കൂട്ടത്തിൽ അഞ്ജുവിന്റെ ഭാര്യ അനിതയാണ് മരിച്ചത്. ഇന്ന് രാവിലെ എട്ടരയോടെ തെക്കേക്കരയിലെ കുത്തനെയുള്ള ഇറക്കത്തിൽ വാഹനം നിയന്ത്രണം നഷ്ടമായി താഴ്ചയിലേക്ക് മറിയുകയായിരുന്നു.

ഉടൻ തന്നെ ചിറ്റാറിലെ ആശുപത്രിയിൽ പ്രവേശിപ്പിച്ചു. അവിടെ നിന്ന് പത്തനംതിട്ട ആശുപത്രിയിലേക്കുള്ള യാത്രാമധ്യേ മരണം സംഭവിക്കുകയായിരുന്നു. ചിറ്റാർ ഗവ. സ്‌കൂളിലേക്കുള്ള കുട്ടികളുമായി പോയ ഓട്ടോയാണ് അപകടത്തിൽപ്പെട്ടത്. അനിതയുടെ മകനും ഓട്ടോയിൽ ഉണ്ടായിരുന്നു. കുട്ടികളുടെ പരുക്ക് സാരമുള്ളതല്ല. അനിതയും ഭർത്താവ് അഞ്ജുവും ഓട്ടോഡ്രൈവർമാരാണ്. രണ്ടു പേർക്കും സ്വന്തമായി ഓട്ടോയുണ്ട്.