മുഖ്യമന്ത്രിയോ സുരേഷ് ഗോപിയോ എത്തണം; വൈദ്യുതി ടവറിൽ കയറി യുവാവിന്റെ ആത്മഹത്യാ ഭീഷണി; അനുനയിപ്പിച്ചു താഴെയിറക്കി പഞ്ചായത്ത് പ്രസിഡന്റ്

കോട്ടയം: വൈദ്യുതി ടവറിൽ കയറി ആത്മഹത്യാ ഭീഷണി മുഴക്കിയ യുവാവിനെ അനുനയിപ്പിച്ചു താഴെ ഇറക്കി യുവാവ്. മണിക്കൂറുകൾ നേരം ടവറിന്റെ മുകളിൽ കയറിയ യുവാവിനെ കിടങ്ങൂർ പഞ്ചായത്ത് പ്രസിഡന്റും മറ്റ് ജനപ്രതിനിധികളും അനുനയിപ്പിച്ച് താഴെയിറക്കി. ഈരാറ്റുപേട്ട സ്വദേശി പ്രദീപ് ആണ് രാവിലെ ടവറിൽ കയറി ആത്മഹത്യ ഭീഷണി മുഴക്കിയത്.

നിരവധി ആവശ്യങ്ങൾ മുഴക്കിയാണ് യുവാവ് ടവറിൽ കയറി ആത്മഹത്യാ ഭീഷണി നടത്തിയത്. മുഖ്യമന്ത്രിയോ സുരേഷ് ഗോപിയോ സ്ഥലത്ത് എത്തിയാൽ മാത്രമെ താഴെയിറങ്ങുകയുള്ളുവെന്നായിരുന്നു പ്രദീപ് ആദ്യം പറഞ്ഞത്. തനിക്ക് സ്വന്തമായി ഒരുവീടില്ലെന്നും നിരവധി കുടുംബ പ്രശ്നങ്ങൾ ഉണ്ടെന്നും ഇയാൾ ടവറിന്റെ മുകളിൽ നിന്നും വിളിച്ചുപറഞ്ഞിരുന്നു.

രാവിലെ ആറ് മണിയോടെയാണ് ഇയാൾ ടവറിൽ കയറിയതെന്നാണ് സൂചന. എട്ടുമണിയോടെയാണ് ഇത് നാട്ടുകാരുടെ ശ്രദ്ധയിൽപ്പെട്ടത്. അവർ പൊലീസിനെ അറിയിക്കുകയായിരുന്നു. തുടർന്ന് പൊലീസും ഫയർഫോഴ്സും സ്ഥലത്തെത്തി. അവിടെയെത്തിയ കിടങ്ങല്ലൂർ പഞ്ചായത്ത്് പ്രസിഡന്റും മറ്റ് ജനപ്രതിനിധികളും യുവാവിനെ അനുനയിപ്പിക്കുകയായിരുന്നു. താങ്കളുടെ പ്രശ്നങ്ങൾ പരിഹരിക്കാമെന്ന് ജനപ്രതിനിധികൾ ഉറപ്പുനൽകുകയും ചെയ്തു.

കിടങ്ങൂർ പഞ്ചായത്തിന് സമീപ പഞ്ചായത്തിലെ താമസക്കാരനാണ് പ്രദീപ്. ആ പഞ്ചായത്ത് അധികൃതരുമായി സംസാരിച്ച് മാർച്ചിനുള്ളിൽ വീട് വയ്ക്കാനുള്ള അവസരം ഉണ്ടാക്കും. ഇല്ലെങ്കിൽ കിടങ്ങൂർ പഞ്ചായത്തിൽ വീട് വച്ച് നൽകാമെന്നും പ്രസിഡന്റ് ഉറപ്പുനൽകിയതിന് പിന്നാലെയാണ് പ്രദീപ് ടവറിൽ നിന്ന് ഇറങ്ങിയത്. പ്രദീപിനെ പൊലീസ് കസ്റ്റഡിയിലെടുത്തു.