ആമയിഴഞ്ചാന്‍ തോട് ശുചീകരണത്തിന് ബജറ്റില്‍ നീക്കി വച്ച 12 കോടി എവിടെ പോയി? മന്ത്രിയും മേയറും ഉത്തരം നല്‍കണമെന്ന് വി. മുരളീധരന്‍
തിരുവനന്തപുരം: ആമയിഴഞ്ചാന്‍ തോട് ശുചീകരണത്തിനായി ബജറ്റില്‍ നീക്കി വച്ച കോടികള്‍ എന്ത് ചെയ്തുവെന്ന ചോദ്യത്തിന് തദ്ദേശവകുപ്പ് മന്ത്രിയും ജലസേചന മന്ത്രിയും മേയറും ഉത്തരം നല്‍കണമെന്ന് മുന്‍ കേന്ദ്രമന്ത്രി വി. മുരളീധരന്‍. ശുചീകരണത്തൊഴിലാളി ജോയിയുടെ മരണത്തില്‍ റെയില്‍വെയെ പഴിചാരി തടിയൂരാനുള്ള ശ്രമം ജനങ്ങള്‍ പുച്ഛിച്ച് തള്ളുമെന്നും മുന്‍ കേന്ദ്രമന്ത്രി പറഞ്ഞു.
പന്ത്രണ്ട് കിലോമീറ്റര്‍ തോട് വൃത്തിയാക്കാന്‍ ബജറ്റില്‍ നീക്കി വച്ച 12 കോടി എവിടെ പോയി എന്നതില്‍ വിശദീകരണം വേണമെന്ന് മുരളീധരന്‍ ആവശ്യപ്പെട്ടു. നഗരസഭാ കാര്യാലയത്തിലേക്ക് ബിജെപി തിരുവനന്തപുരം ജില്ലാ കമ്മിറ്റി സംഘടിപ്പിച്ച മാര്‍ച്ച് ഉദ്ഘാടനം ചെയ്യുകയായിരുന്നു അദ്ദേഹം.
മാലിന്യം തടയുന്നതിനായി റെയില്‍വേയുടെ പ്രദേശത്തേക്കു കടക്കുന്ന തോടിന്റെ ഭാഗത്ത് ഇരുമ്പുവലയും ഇരുമ്പുവേലിയും സ്ഥാപിച്ചിട്ടുണ്ട്. ബാക്കി ഭാഗങ്ങളില്‍ നഗരസഭ എന്ത് ചെയ്തു എന്ന് വിശദീകരിക്കണം.മേയര്‍ക്ക് കമ്പം കാറോട്ടത്തിലാണെന്ന് മുരളീധരന്‍ പരിഹസിച്ചു. കാറിന്റെ പിന്നിലിരുന്ന് കെഎസ്ആര്‍ടിസി ഡ്രൈവറുടെ ആക്ഷന്‍ കാണുന്ന മേയര്‍ കണ്‍മുന്നിലെ മാലിന്യ കൂമ്പാരം കാണില്ല.
തദ്ദേശവകുപ്പ് മന്ത്രി അന്താരാഷ്ട്ര വിഷയങ്ങളില്‍ ഫേസ്ബുക്ക് പോസ്റ്റ് ഇട്ടാല്‍ മാത്രം പോരാ. സാധാരണക്കാരുടെ വിഷയങ്ങളില്‍ പരിഹാരം കണ്ടെത്തണമെന്ന് മുരളീധരന്‍ ഓര്‍മിപ്പിച്ചു. ക്ഷേമ പെന്‍ഷന്‍ കൊടുക്കാന്‍ ഇല്ലാത്ത കാലത്തും കുടുംബസമേതം വിദേശയാത്ര പോയ വ്യക്തിയാണ് എം. ബി. രാജേഷ്. വിനോദസഞ്ചാരം നടത്തി മടങ്ങിയാല്‍ പോര വിദേശരാജ്യങ്ങളിലെ നഗരപരിപാലനം കൂടി കണ്ണു തുറന്ന് കാണണമെന്നും വി. മുരളീധരന്‍ പറഞ്ഞു.
സംസ്ഥാന സര്‍ക്കാരിന്റെ പരാജയങ്ങളുടെ ഉത്തരവാദിത്തം കേന്ദ്രത്തിന് മേല്‍ കെട്ടിവയ്ക്കാനുള്ള നീക്കം ജനം തിരിച്ചറിയുന്നുണ്ട്.. പെന്‍ഷന്‍ മുടങ്ങിയാലും ആന ഇറങ്ങിയാലും
മാലിന്യ സംസ്‌കരണം പിഴച്ചാലും കുറ്റം മോദിക്ക് എന്നതാണ് സംസ്ഥാന മന്ത്രിമാരുടെ നിലപാട്. പിണറായി വിജയന്റെ ദുര്‍ഭരണത്തെ എന്നെന്നേക്കുമായി കേരളം തൂത്തെറിയുന്ന കാലം അകലെയല്ലെന്നും വി. മുരളീധരന്‍ കൂട്ടിച്ചേര്‍ത്തു.
