ബസിന്റെ വാതിലിലൂടെ തെറിച്ചു വീണ് സ്‌കൂള്‍ വിദ്യാര്‍ത്ഥിക്ക് പരിക്കേറ്റു; നിര്‍ത്താതെ പോയ ബസ് തടഞ്ഞ് നാട്ടുകാര്‍
തിരുവനന്തപുരം: കാട്ടാക്കടയില്‍ ഓടുന്ന കെഎസ്ആര്‍ടിസി ബസിന്റെ വാതിലിലൂടെ പുറത്തേക്ക് തെറിച്ചു വീണ് സ്‌കൂള്‍ വിദ്യാര്‍ത്ഥിക്ക് പരിക്കേറ്റു. പ്ലസ് ടു വിദ്യാര്‍ത്ഥിയായ സന്ദീപിനാണ് പരിക്കേറ്റത്. വാതിലിലൂടെ കുട്ടി തെറിച്ചു വീണ വിവരം ഡ്രൈവറെ അറിയിച്ചിട്ടും ബസ് നിര്‍ത്താതെ പോയെന്ന് കുട്ടിയുടെ പിതാവ് പറഞ്ഞു. സംഭവത്തില്‍ കുട്ടിയുടെ പിതാവ് പൊലീസില്‍ പരാതി നല്‍കി. നിലവില്‍, സമീപത്തെ ആശുപത്രിയില്‍ ചികിത്സയില്‍ കഴിയുകയാണ് സന്ദീപ്.
തിരുമല എഎംഎച്ച്എസ് സ്‌കൂളിലേക്ക് പോകാന്‍ പൊട്ടന്‍കാവില്‍ നിന്നും ബസ് കയറിയ സന്ദീപ് അന്തിയൂര്‍ക്കോണം പാലം കഴിഞ്ഞപ്പോഴാണ് ബസില്‍ നിന്നും തെറിച്ചു വീണത്. കുട്ടിയുടെ ശരീരത്തില്‍ ഗുരുതരമായ പരിക്കുകള്‍ ഉണ്ടായിരുന്നതായും പിതാവ് പ്രതികരിച്ചു. വിദ്യാര്‍ത്ഥി ബസില്‍ നിന്നും തെറിച്ച് വീണിട്ടും ഡ്രൈവര്‍ ബസ് നിര്‍ത്താന്‍ കൂട്ടാക്കിയില്ല. അന്തിയൂര്‍ക്കോണം ജംഗ്ഷനില്‍ എത്തിയപ്പോള്‍ നാട്ടുകാരും സഹയാത്രികരും തടഞ്ഞാണ് ബസ് നിര്‍ത്തിയത്.
