ആലപ്പുഴ: ബിജെപി നേതാവും ഒബിസി മോർച്ച സംസ്ഥാന സെക്രട്ടറിയായിരുന്ന അഭിഭാഷകൻ രഞ്ജിത്ത് ശ്രീനിവാസൻ കൊലക്കേസിൽ പ്രതികൾക്ക് എല്ലാം വധശിക്ഷ കിട്ടുമ്പോൾ അപ്പീൽ കോടതിയുടെ തീരുമാനങ്ങൾ നിർണ്ണായകമാകും. മാവേലിക്കര അഡീഷണൽ സെഷൻസ് ജഡ്ജി വി.ജി. ശ്രീദേവിയാണ് ശിക്ഷ വിധിച്ചത്. എല്ലാ പ്രതികൾക്കു മേലും വധശിക്ഷ നിലനിൽക്കുമെന്ന് കോടതി നേരത്തെ കണ്ടെത്തിയിരുന്നു.

രഞ്ജിത് ശ്രീനിവാസനെ പുരയ്ക്കകത്ത് കയറി കൊലപ്പെടുത്താൻ നേതൃത്വം കൊടുത്ത ഒന്ന് മുതൽ എട്ടുവരെയുള്ള പ്രതികൾക്ക്മേലുള്ള കൊലപാതക കുറ്റം തെളിഞ്ഞിരുന്നു. അകത്ത് കയറിയ പ്രതികളെ സഹായിക്കനായി വീടിന് പുറത്ത് നിന്ന ഒമ്പത് മുതൽ 12 വരെയുള്ള പ്രതികൾക്കെതിരെയും സെക്ഷൻ 149-ാംവകുപ്പ് പ്രകാരം കൊലക്കുറ്റം തെളിഞ്ഞു. കൊലപാതകത്തിന്റെ ഗൂഢാലോചനയ്ക്ക് നേതൃത്വം കൊടുത്ത 13,14,15 പ്രതികൾക്കെതിരെയും കൊലക്കുറ്റംതെളിഞ്ഞു. ഈ സാഹചര്യത്തിലാണ് വധശിക്ഷ.

അതിക്രൂരമായി ചുറ്റികയ്ക്ക് അടിച്ചും മറ്റുമാണ് രഞ്ജിത്തിനെ പ്രതികൾ കൊലപ്പെടുത്തിയത്. പോപ്പുലർഫ്രണ്ട് അനുകൂലികളാണ് ഇവരെല്ലാം. മാവേലിക്കര അഡീഷണൽ സെഷൻസ് കോടതി ജഡ്ജി വി.ജി. ശ്രീദേവിയാണ് ശിക്ഷ വിധിക്കുന്നത്. നവാസ്, ഷമീർ, നസീർ, സക്കീർ ഹുസൈൻ, ഷാജി പൂവത്തിങ്കൽ, ഷെർണാസ് അഷ്റഫ്, നൈസാം, അജ്മൽ, അനൂപ്, മുഹമ്മദ് അസ്ലം, സലാം പൊന്നാട്, അബ്ദുൽ കലാം, സഫറുദ്ദീൻ, മുൻഷാദ്, ജസീബ് രാജ എന്നിവരാണ് കേസിലെ പ്രതികൾ. ഇതിൽ ഒന്ന് മുതൽ എട്ട് വരെയുള്ള പ്രതികൾക്കെതിരെ കൊലക്കുറ്റം തെളിഞ്ഞിരുന്നു.

ഇവർ വീട്ടിൽ അതിക്രമിച്ച് കയറിയതായും കണ്ടെത്തിയിട്ടുണ്ട്. അപൂർവങ്ങളിൽ അപൂർവമായ കേസാണ് ഇതെന്നും പരമാവധി ശിക്ഷ നൽകണമെന്നുമാണ് പ്രോസിക്യൂഷൻ വാദിച്ചത്. ഇത് കോടതി അംഗീകരിക്കുകയാണ്. 2021 ഡിസംബർ 19-നായിരുന്നു രഞ്ജിത്ത് ശ്രീനിവാസൻ കൊല്ലപ്പെട്ടത്. ആലപ്പുഴ വെള്ളക്കിണറിലെ വീട്ടിൽ അതിക്രമിച്ച് കയറി അമ്മയുടെയും ഭാര്യയുടെയും മകളുടെയും മുൻപിൽ വച്ച് വെട്ടി കൊലപ്പെടുത്തുകയായിരുന്നു. മൂന്ന് ഘട്ടങ്ങളിലായി വൻ ഗൂഢാലോചനകൾക്ക് ശേഷമായിരുന്നു കൊല എന്നാണ് ആരോപണം.

വയലാറിൽ നന്ദുകൃഷ്ണ എന്നയാളുടെ കൊലപാതകത്തിന് ശേഷം ഒരു ഹിറ്റ്ലിസ്റ്റ് തയ്യാറാക്കിയിരുന്നു. മൂന്നാം പ്രതിയായ അനൂപിന്റെ ഭാര്യാ വീട്ടിൽ നിന്ന് കണ്ടെടുത്ത മൊബൈൽ ഫോണിൽ നിന്നാണ് പൊലീസ് അന്വേഷണത്തിൽ ഹിറ്റ് ലിസ്റ്റ് കണ്ടെത്തിയത്. ഇതിൽ ഒന്നാമത്തെ പേര് കൊലചെയ്യപ്പെട്ട രഞ്ജിത് ശ്രീനിവാസന്റേതായിരുന്നു. ആ ലിസ്റ്റിൽ ധാരാളം പേരുകളുണ്ടായിരുന്നു. ഇത് ഭീകരതയായി വിലയിരുത്തപ്പെട്ടു. ഈ സാഹചര്യമാണ് കേസിനെ അത്യപൂർവ്വങ്ങളിൽ അത്യപൂർവ്വമാക്കിയത്.

വയലാർ സ്വദേശിയായ നന്ദു കൃഷ്ണയെ കൊലപ്പെടുത്തിയപ്പോൾ തന്നെ പ്രതികാരക്കൊല നടക്കുമെന്ന് എസ്ഡിപിഐക്കാരായ പ്രതികൾ മുൻകൂട്ടി കണ്ടിരുന്നുവെന്നും അങ്ങനെ സംഭവിച്ചാൽ പകരം ഒരാളെ കൊലപ്പെടുത്താൻ നേരത്തെ തന്നെ തീരുമാനിച്ചിരുന്നുവെന്നും പ്രോസിക്യൂഷൻ കോടതിയിൽ പറഞ്ഞിരുന്നു. കേസിൽ 15 പോപ്പുലർ ഫ്രണ്ടു കാരാണ് വിചാരണ നേരിട്ടത്. ആലപ്പുഴ ഡിവൈ.എസ്‌പി എൻ.ആർ ജയരാജ് അന്വേഷണം പൂർത്തിയാക്കി കുറ്റപത്രം സമർപ്പിച്ച കേസിൽ 1,000-ത്തോളം രേഖകളും 100-ലധികം തൊണ്ടിമുതലുകളും തെളിവായി ഹാജരാക്കി. വിരലടയാളങ്ങൾ, ശാസ്ത്രീയ തെളിവുകൾ, സിസിടിവി ദൃശ്യങ്ങൾ, ഗൂഗിൾ മാപ്പിന്റെ സഹായത്തോടെ തയ്യാറാക്കിയ റൂട്ടുമാപ്പുകൾ തുടങ്ങിയ തെളിവുകളും കേസിൽ ഹാജരാക്കി. ഇതെല്ലാം വിധിയിൽ നിർണ്ണായകമായി.

പോപ്പുലർ ഫ്രണ്ടുകാർക്ക് രൺജിത്ത് ശ്രീനിവാസനെ കൊല്ലണമെന്ന ഉദ്ദേശ്യം വളരെ നേരത്തേ തന്നെയുണ്ടായിരുന്നു. ഇതിനായി വിപുലമായ മുന്നൊരുക്കങ്ങളും ഗൂഢാലോചനകളും പ്രതികൾ നടത്തിയിരുന്നു. പ്രത്യേകം പരിശീലനം ലഭിച്ചവരാണ് കൊല നടത്തിയത്. ഡിസംബർ 18-ന് പ്രതികൾ ഒത്തുകൂടുകയും രൺജിത്ത് ശ്രീനിവാസനെ കൊലപ്പെടുത്തണമെന്ന് പദ്ധതിയിടുകയും ചെയ്തുവെന്നായിരുന്നു പ്രോസിക്യൂഷൻ വാദം.

അർദ്ധരാത്രി രൺജിത്ത് ശ്രീനിവാസന്റെ വീട്ടിലെത്തിയ സംഘം കൊലയ്ക്ക് അനുകൂലമായ സാഹചര്യമല്ലെന്ന് കണ്ട് മടങ്ങി. പിറ്റേന്ന് രാവിലെ ആറ് മണിയോടെ വീട്ടിലെത്തി വെട്ടി കൊലപ്പെടുത്തുകയായിരുന്നുവെന്നാണ് പ്രോസിക്യൂഷൻ കേസ്. എസ്ഡിപിഐ സംസ്ഥാന സെക്രട്ടറിയായിരുന്ന കെ എസ് ഷാൻ പതിനെട്ടാം തീയതി രാത്രിയാണ് കൊല്ലപ്പെട്ടത്. പിറ്റേന്ന് രാവിലെയാണ് രഞ്ജിത്ത് ശ്രീനിവാസൻ കൊല്ലപ്പെടുന്നത്.

രഞ്ജിത്ത് ശ്രീനിവാസൻ പ്രാകീടീസ് ചെയ്തിരുന്ന ആലപ്പുഴ കോടതിയിൽ നിന്നു കേസിന്റെ വിചാരണ മാറ്റണമെന്ന് ആവശ്യപ്പെട്ട് പ്രതികൾ ഹൈക്കോടതിയെ സമീപിച്ചിരുന്നു. ഇതേ തുടർന്ന് കേസിന്റെ വാദം നടന്നത് മാവേലിക്കര അഡീഷണൽ ജില്ലാ സെഷൻസ് കോടതിയിലാണ് നടന്നത്. ഷാൻ വധക്കേസിൽ 13 ആർഎസ്എസ് ബിജെപി പ്രവർത്തകർ അറസ്റ്റിലായിരുന്നു. ഇവരെല്ലാം ജാമ്യത്തിലാണ്.