സുരേഷ് ഗോപിയുടെ തൃശൂരിൽ നിന്ന് ശ്രീരാമന്റെ അയോദ്ധ്യയിലേക്ക്; സംഘത്തോടൊപ്പം എല്ലാവർക്കും പ്രിയങ്കരിയായ ബെല്ലയും; ഇന്ത്യ മുഴുവൻ 20,000 കിലോമീറ്റർ സഞ്ചരിച്ച ഈ മിടുക്കി നായ ലഹരി വിരുദ്ധ പ്രചാരകയും; യാത്ര ഫ്ളാഗ് ഓഫ് ചെയ്യുന്നത് പ്രധാനമന്ത്രിയുടെ സാന്നിധ്യത്തിൽ
തൃശൂർ: ബെല്ലയെ അറിയില്ലേ? നല്ല മോടിയായി വസ്ത്രം ധരിച്ച് കൂളിങ് ഗ്ലാസും വച്ച് എല്ലാവരോടും ഇണങ്ങുന്ന നായ. ബുദ്ധിമതിയായ ഈ നായയുടെ ഉടമസ്ഥനെയും മിക്കവർക്കും അറിയാം. ടൂറിസം പൊലീസ് ഉദ്യോഗസ്ഥനായിരുന്ന രഘു പി എസ്. കഴിഞ്ഞ വർഷം ലഹരിവിരുദ്ധ പ്രചാരണവുമായി ഇന്ത്യ മുഴുവൻ 45 ദിവസം കൊണ്ട് 20000 കിലോമീറ്റർ സഞ്ചരിച്ചിട്ടുണ്ട് ബെല്ല. ഇപ്പോൾ, തൃശ്ശൂരിൽ നിന്നും അയോദ്ധ്യയിലെ രാമക്ഷേത്രത്തിലേക്ക് പുറപ്പെടുന്ന സംഘത്തോടൊപ്പം ബെല്ലയും ഉണ്ട്.
2024 ജനുവരി 3 ന് തൃശ്ശൂരിലെത്തുന്ന പ്രധാനമന്ത്രി നരേന്ദ്ര മോദിയുടെ സാന്നിദ്ധ്യത്തിൽ അയോദ്ധ്യ യാത്ര ഫ്ളാഗ് ഓഫ് ചെയ്യപ്പെടും. മുൻ എംപി സുരേഷ് ഗോപി ചടങ്ങിൽ പങ്കെടുക്കും
ബെല്ല ഒരു പൊലീസ് നായ അല്ലെങ്കിലും ഒരു പ്രൊഫഷണൽ പരിശീലകനിൽ നിന്ന് ആവശ്യമായ എല്ലാ പരിശീലനവും കിട്ടിയിട്ടുണ്ട്. അഞ്ചര വയസുള്ള ബെല്ല രഘുവിനൊപ്പം 26 സംസ്ഥാനങ്ങളിലൂടെ 20,000 കിലോമീറ്റർ യാത്ര പൂർത്തിയാക്കിയിരുന്നു. മയക്കുമരുന്ന് രഹിത ഇന്ത്യ എന്ന ആശയപ്രചാരണവുമായിട്ടായിരുന്നു ആ യാത്ര. രഘുവിന്റെ സന്തത സഹചാരിയാണ് ബെല്ല.
ഒരുമാസ് പ്രായമുള്ളപ്പോഴാണ് ബെല്ലയെ രഘുവിന് കിട്ടുന്നത്. രഘു സ്ഥിരമായി കൂളിങ് ഗ്ലാസ് വയ്ക്കുന്നയാളാണ്. അതുകണ്ടപ്പോൾ ബെല്ലയ്ക്കും ഒരുകൊതി. ഒരുദിവസം കൂളിങ് ഗ്ലാസും കടിച്ചുപിടിച്ച് ബെല്ല രഘുവിന്റെ അടുത്തുചെന്ന് തലകുനിച്ചുപിടിച്ചു. രഘുവിന് കാര്യം മനസ്സിലായി. പിന്നീട് രഘു ഓഫീസിൽ പോകുമ്പോഴൊക്കെ ബൈക്കിൽ കൂളിങ് ഗ്ലാസും വച്ച് ബെല്ലയുണ്ടാകും. ലണ്ടനിലേക്കുള്ള രഘൂവിന്റെ റോഡ് മാർഗ്ഗമുള്ള കാർ യാത്രയിലും ബെല്ല പങ്കാളിയാണ്.
ദുബായ് പൊലീസിനായി നായ്ക്കളെ പരിശീലിപ്പിച്ച ഒരു പ്രൊഫഷണലിൽ നിന്നാണ് അവൾക്ക് എല്ലാ പരിശീലനവും ലഭിച്ചത്, രഘു പറഞ്ഞു. ഫോർട്ട്കൊച്ചി പൊലീസ് സ്റ്റേഷനിൽ വച്ച് അവൾ എന്നെ അനുഗമിക്കുമായിരുന്നുവെന്ന് അദ്ദേഹം പറഞ്ഞു. ഇന്ത്യ മുഴുവനുള്ള യാത്രയിൽ ക്രൈംബ്രാഞ്ചിലുള്ള ചന്ദ്രബാബുവായിരുന്നു മിഷന്റെ കോ-ഓർഡിനേറ്റർ.
'രാജ്യത്ത് വർദ്ധിച്ചുവരുന്ന മയക്കുമരുന്ന് ഭീഷണിയെക്കുറിച്ചുള്ള അവബോധം പ്രചരിപ്പിക്കുക, ലഹരിവിരുദ്ധ സന്ദേശങ്ങൾ പൊതുജനങ്ങളിലേക്ക് എത്തിക്കുക എന്നിവയായിരുന്നു ഇന്ത്യാ യാത്രയുടെ ലക്ഷ്യം,' അദ്ദേഹം പറഞ്ഞു. ബെല്ലയായിരുന്നു മിഷന്റെ അംബാസഡർ. ഡൽഹി ആസ്ഥാനമായുള്ള ഗ്ലോബൽ പീസ് ഫൗണ്ടേഷനുമായി സഹകരിച്ചായിരുന്നു ദൗത്യം. മയക്കുമരുന്ന് ഉപയോഗ വിരുദ്ധ സന്ദേശങ്ങൾ അച്ചടിച്ച ജാക്കറ്റുകൾ ധരിച്ചായിരുന്നു ബെല്ലയുടെ യാത്ര.
