വിദേശ സന്ദർശനം കഴിഞ്ഞുവന്നയുടൻ പേനയെടുത്ത് കത്തെഴുതി; തന്റെ രണ്ടുവർഷത്തെ ഗതാഗത പരിഷ്‌കാരങ്ങൾ അമ്പേ പരാജയമെന്നും ഇ ബസുകൾ നഷ്ടമെന്നും മന്ത്രി ഗണേശ് കുമാർ തുറന്നടിച്ചതോടെ മടുപ്പായി; കെ എസ് ആർ ടി സി എം ഡി സ്ഥാനവും ഗതാഗത സെക്രട്ടറി പദവും ഉപേക്ഷിക്കുന്നുവെന്ന് ചീഫ് സെക്രട്ടറിക്ക് കത്തുനൽകി ബിജു പ്രഭാകർ; അന്തിമ തീരുമാനം എടുക്കുക മുഖ്യമന്ത്രി
തിരുവനന്തപുരം: സാമ്പത്തിക പ്രതിസന്ധിയുടെ നിലയില്ലാ കയത്തിൽ കിടന്ന് കൈകാലിട്ടടിക്കുന്ന കെഎസ്ആർടിസിയെ പ്രൊഫഷണലാക്കാൻ കച്ച കെട്ടിയിറങ്ങിയവർക്ക് ഒക്കെ കൈപൊള്ളിയിട്ടുണ്ട്. രാജമാണിക്യവും ഹേമചന്ദ്രനും തച്ചങ്കരിയും എംപി ദിനേശും ഒക്കെ പരിശ്രമിച്ച് പിന്മാറിയ റോളിൽ ബിജു പ്രഭാകർ 2020ൽ എത്തുമ്പോൾ, തന്റെ മാനേജ്മന്റ് രംഗത്തെ മികവ് തുണയാകുമെന്ന പ്രതീക്ഷയിലായിരുന്നു അദ്ദേഹം. എന്നാൽ, ഏറെ വിയർപ്പൊഴുക്കിയിട്ടും, പരിഷ്‌കാരങ്ങൾ വരുത്തിയിട്ടും കാര്യങ്ങൾ അത്ര പന്തിയല്ല. ഗതാഗത മന്ത്രി കെ ബി ഗണേശ് കുമാറുമായി സ്വരച്ചേർച്ച ഇല്ലാതെ വന്നതോടെയാണ് ബിജു പ്രഭാകർ രാജി തീരുമാനിച്ചത്. കഴിഞ്ഞ വർഷവും അദ്ദേഹം ചീഫ് സെക്രട്ടറിയെ കണ്ട് രാജി സന്നദ്ധത അറിയിച്ചിരുന്നു.
ഇലക്ട്രിക് ബസ് വിവാദത്തിന് പിന്നാലെയാണ് കെഎസ്ആർടിസി എംഡി സ്ഥാനത്തുനിന്ന് ഒഴിവാക്കണമെന്ന് ബിജു പ്രഭാകർ ആവശ്യപ്പെട്ടത്. ഈ ആവശ്യം ഉന്നയിച്ച് ബിജു പ്രഭാകർ ചീഫ് സെക്രട്ടറിക്ക് കത്ത് നൽകി. ഇലക്ട്രിക് ബസിലടകം നയപരമായ കാര്യങ്ങളിൽ മന്ത്രിയുമായുള്ള അഭിപ്രായ വ്യത്യാസമാണ് എംഡി സ്ഥാനം ഒഴിയാൻ കാരണമെന്നാണ് സൂചന. വിദേശത്തായിരുന്ന ബിജു പ്രഭാകർ കഴിഞ്ഞ മാസം 28ന് മടങ്ങിയെത്തിയശേഷം കെഎസ്ആർടിസി ഓഫീസിൽ പോവുകയോ ഫയലുകളിൽ തീരുമാനമെടുക്കുകയോ ചെയ്തിട്ടില്ല. എംഡി സ്ഥാനത്തിന് പുറമെ ഗതാഗത സെക്രട്ടറിയുടെ ചുമതലയും ഒഴിമെന്നാണ് സൂചന.
ഇലക്ട്രിക് ബസ് ലാഭകരമല്ലെന്നും ഇനി വാങ്ങില്ലെന്നുമുള്ള കെബി ഗണേശ് കുമാറിന്റെ പ്രസ്താവന സിപിഎമ്മിലും ഇടതുമുന്നണിയിലും അസ്വാരസ്യം
സൃഷ്ടിച്ചിരുന്നു. കെഎസ്ആർടിസിയിലെ നയപരമായ തീരുമാനങ്ങളിൽ ഉൾപ്പെടെ ഗണേശ്‌കുമാർ ഏകപക്ഷീയമായ ഇടപെടൽ നടത്തുന്നുവെന്ന ആരോപണവും ഇതിനുപിന്നാലെ ഉയർന്നു. ഇലക്ട്രിക് ബസ് സർവീസുമായി ബന്ധപ്പെട്ട റിപ്പോർട്ട് മന്ത്രിക്ക് ലഭിക്കുന്നതിന് മുമ്പെ മാധ്യമങ്ങൾക്ക് ഉൾപ്പെടെ ലഭിച്ചുവെന്ന പരാതിയും ഉയർന്നുവന്നിരുന്നു.
ആന്റണി രാജുവിന്റെ പകരക്കാരനായി ഗതാഗതമന്ത്രി സ്ഥാനത്ത് കെ.ബി. ഗണേശ് കുമാർ എത്തിയപ്പോൾ മുതൽ ബിജു പ്രഭാകറുമായി നയപരമായ വിഷയങ്ങളിൽ അഭിപ്രായ ഭിന്നതയുണ്ടായിരുന്നു. എങ്കിലും അദ്ദേഹം എംഡി സ്ഥാനത്തു തുടരുകയായിരുന്നു. ഇത്തരം വിഷയങ്ങളിൽ ഗണേശ് കുമാർ പരസ്യമായി വിയോജിപ്പ് രേഖപ്പെടുത്തിയപ്പോൾ അത് മാനേജ്‌മെന്റിന്റെ പിടിപ്പുകേടായി വ്യാഖ്യാനിക്കപ്പെട്ടിരുന്നു. ഈ സാഹചര്യത്തിൽ തന്നെയും മാറ്റണം എന്ന നിലപാടാണ് ബിജു പ്രഭാകറിന് ആദ്യം മുതൽ ഉണ്ടായിരുന്നത്.
കെഎസ്ആർടിസി -സ്വിഫ്റ്റ് എംഡി സ്ഥാനം ഒഴിഞ്ഞേ മതിയാകൂവെന്ന തീരുമാനത്തിലാണ് ബിജു പ്രഭാകർ. വ്യക്തിപരമായ കാരണങ്ങളാലാണ് ഒഴിയുന്നതെന്നാണ് വിശദീകരണം. ജോലിത്തിരക്കുകളാൽ കെഎസ്ആർടിസിക്കാര്യത്തിൽ വേണ്ടത്ര ശ്രദ്ധിക്കാൻ കഴിയുന്നില്ലെന്നും സ്ഥാനത്തുനിന്ന് ഒഴിവാക്കണമെന്നും ബിജു ആവശ്യപ്പെട്ടിരുന്നു. എന്നാൽ പുതിയ ഗതാഗത വകുപ്പ് മന്ത്രി വന്നതും മന്ത്രി ഗണേശ് കുമാറിന്റെ തീരുമാനങ്ങൾക്കും നടപടികൾക്കും വിലക്കും തിരുത്തും വന്നതും മറ്റും പ്രതിസന്ധിക്ക് കാരണമാണെന്ന വ്യാഖ്യാനങ്ങളുമുണ്ട്.
വകുപ്പ് മന്ത്രി കെ.ബി.ഗണേശ് കുമാറിനോടും ചീഫ് സെക്രട്ടറി വി.വേണുവിനോടുമാണ് ബിജു പ്രഭാകർ തന്നെ മാറ്റണമെന്ന ആവശ്യമുന്നയിച്ചത്. പുതിയ മേധാവിയെ നിയോഗിക്കുന്നതുവരെ ജോയിന്റ് എം.ഡി പ്രമോജ് ശങ്കറിന് ചുമതല നൽകുന്നതും മന്ത്രി ആലോചിച്ചിരുന്നു. മന്ത്രിയുമായുള്ള അഭിപ്രായ വ്യത്യാസ തുടർന്നാണ് പദവി ഒഴിയാൻ താത്പര്യം പ്രകടിപ്പിച്ചതെന്നാണ് സൂചന. എന്നാൽ മുഖ്യമന്ത്രിയുടെ മനസ്സ് ബിജു പ്രഭാകറിനൊപ്പമാണ്. തൽകാലം മാറ്റേണ്ടതില്ലെന്നാണ് പക്ഷം.കെ.ടി.ഡി.എഫ്.സി സി.എം.ഡിയുടെ ചുമതലയും ബിജുവിനാണ്. ഇലക്ട്രിക് ബസുമായുള്ള വിവാദങ്ങളാണ് മന്ത്രിയേയും കെ എസ് ആർ ടി സി എംഡിയേയും അകറ്റിയത്. ഇതോടെയാണ് ബിജു പ്രഭാകർ സ്ഥാനം ഒഴിയാൻ സന്നദ്ധനായത്.
കെ.എസ്.ആർ.ടി.സിയിൽ കഴിഞ്ഞ രണ്ടര വർഷമായി നടന്നുവന്ന പരിഷ്‌കാര പ്രവർത്തനങ്ങളെല്ലാം ശരിയല്ലെന്ന മന്ത്രി ഗണേശ് കുമാറിന്റെ നിലപാടിൽ ബിജു പ്രഭാകർ അതൃപ്തനായിരുന്നു. ഇ ബസ് നഷ്ടമാണെന്ന് അധികാരമേറ്റ ഉടൻ മന്ത്രി ഗണേശ് വാദിച്ചിരുന്നു. എന്നാൽ മന്ത്രിയുടെ വാദം തെറ്റെന്ന് തെളിയിക്കുന്ന റിപ്പോർട്ടാണ് കെ.എസ്.ആർ.ടി.സിയിൽ നിന്ന് പുറത്തു വന്നത്. ഇത് മന്ത്രിയെ ചൊടിപ്പിച്ചിരുന്നു.
അതിനു പിന്നാലെ എം.ഡിയെ മാറ്റാനുള്ള നീക്കം സജീവമായിരുന്നു. ഇതിനിടെ ഗതാഗതമന്ത്രിക്ക് അനുകൂലമായ കണക്കും പുറത്തു വന്നു. ഇ ബസിൽ അഴിമതിയും ആരോപിച്ചു.
