മാപ്രാണം ഷാജിയുടെ പോരാട്ടം പാതി ഫലം കണ്ടു; പഴയ സഖാവിന് ആശ്വാസം
തൃശൂർ: കരുവന്നൂർ ബാങ്കിനു മുന്നിൽ കുത്തിയിരിപ്പു സമരം നടത്തിയ മാപ്രാണം സ്വദേശി വടക്കേത്തല ജോഷിക്ക് നിക്ഷേപിച്ച 28 ലക്ഷം രൂപ മടക്കി നൽകിയത് വിവാദം ആളിക്കത്തുന്നത് ഒഴിവാക്കാൻ. ലോക്‌സഭാ തിരഞ്ഞെടുപ്പ് അടുത്ത സാഹചര്യത്തിൽ കരുവന്നൂരിൽ സമരം ഒഴിവാക്കാൻ ആകുന്നതെല്ലാം ചെയ്യാനാണ് സിപിഎം തീരുമാനം. ഇതിന്റെ ഭാഗമായാണ് ജോഷിക്ക് പണം കിട്ടുന്നത്. കോടതിയിൽ ദയവധത്തിന് അനുമതി തേടി ഹർജി നൽകിയ വ്യക്തിയാണ് മാപ്രാണം ജോഷി.
ദയാവധത്തിന് അനുവദിക്കണമെന്ന് അപേക്ഷ നൽകി കരുവന്നൂർ ബാങ്കിലെ നിക്ഷേപകൻ ചർച്ചയാക്കിയത് ഇരകളുടെ കഷ്ടത. സിപിഎം അനുഭാവിയാണ് ജോഷി. ഹൈക്കോടതിക്കും കേരളാ സർക്കാരിനും ആണ് അപേക്ഷ നൽകിയത്. രോഗിയായ തന്റെ ചികിത്സയ്‌ക്കോ ജീവിതച്ചെലവിനോ മക്കളുടെ വിദ്യാഭ്യാസത്തിനോ പണമില്ലെന്നും അതിനാൽ ദയാവധം അനുവദിക്കണമെന്ന് ആവശ്യപ്പെട്ടാണ് ഷാജി അപേക്ഷ സമർപ്പിച്ചത്. കേരളത്തിന്റെ ചരിത്രത്തിൽ തന്നെ ആദ്യമായാണ് ഈ സംഭവം. ഇതെല്ലാം തിരിച്ചറിഞ്ഞാണ് ഷാജിയെ കുറച്ചു പണം നൽകി സമാധാനിപ്പിച്ച് കരുവന്നൂരിലെ ബാങ്ക് വിടുന്നത്. ജോഷിയുടെ പേരിലുള്ള സ്ഥിര നിക്ഷേപമാണ് മടക്കി നൽകിയത്. ഇനി കുടുംബത്തിന് നിക്ഷേപമുണ്ട്. അതും നൽകാമെന്നാണ് നൽകിയ ഉറപ്പ്.
60 ലക്ഷം രൂപ മൂന്ന് മാസത്തിനുള്ളിൽ തിരിച്ചുനൽകാമെന്നാണ് ബാങ്കിന്റെ ഉറപ്പ്. ഇതിനുപിന്നാലെ കുത്തിയിരിപ്പ് സമരം ജോഷി അവസാനിപ്പിച്ചു. നിക്ഷേപിച്ച മുഴുവൻ തുകയും നൽകണമെന്ന് ആവശ്യപ്പെട്ടാണ് ജോഷി ബാങ്കിന് മുന്നിൽ സമരം നടത്തിയത്. നിക്ഷേപ തട്ടിപ്പിന് ഇരയായ ജോഷി തനിക്കു ചികിത്സയ്ക്ക് അടക്കം പണമില്ലെന്നും വിശദീകരിച്ചിരുന്നു. നിക്ഷേപം തിരിച്ചുകൊടുക്കാമെന്ന ഉറപ്പ് സർക്കാർ പാലിച്ചില്ലെന്നാണ് ജോഷി ആരോപിച്ചത്. കേരള ബാങ്ക് പ്രതിനിധികൾ ജോഷിയുമായി നടത്തിയ ചർച്ചയ്ക്ക് ശേഷമാണ് സമരം അവസാനിപ്പിച്ചത്. കുടുംബാംഗങ്ങളുടെ നിക്ഷേപവും തിരികെ നൽകണമെന്ന് ജോഷി ആവശ്യപ്പെട്ടിട്ടുണ്ട്. നേരത്തെ നവകേരള സദസിലടക്കം ജോഷി പരാതി നൽകിയിരുന്നു. കഴിഞ്ഞ 20 കൊല്ലത്തിനിടെ രണ്ട് തവണ ട്യൂമർ ഉൾപ്പെടെ 21 ശസ്ത്രക്രിയകൾ 53കാരനായ ജോഷിയുടെ ശരീരത്തിൽ നടത്തിയിട്ടുണ്ട്.
20 കൊല്ലത്തിനിടെ രണ്ട് തവണ ട്യൂമർ ഉൾപ്പടെ 21 ശസ്ത്രക്രിയകൾ നടത്തി. ഇനിയും ചികിത്സകൾ നടത്താൻ പണമില്ല. കരുവന്നൂർ ബാങ്കിലാണു കുടുംബത്തിന്റെ മുഴുവൻ സമ്പാദ്യവും നിക്ഷേപിച്ചതെന്നും പണം ലഭിക്കാതായതോടെ കുടുംബച്ചെലവും മക്കളുടെ വിദ്യഭ്യാസവും ചികിത്സയും പ്രതിസന്ധിയിലാണെന്നും ജോഷി ഹൈക്കോടതി ചീഫ് ജസ്റ്റിസിനും മുഖ്യമന്ത്രിക്കും അയച്ച കത്തിൽ വിശദീകരിച്ചിരുന്നു. ഈ മാസം 30ന് ജീവിതം അവസാനിപ്പിക്കാൻ അനുമതി നൽകണമെന്നാണു ജോഷി കത്തിലൂടെ ആവശ്യപ്പെടുന്നത്. ഇത് കൂടി മനസ്സിലാക്കിയായിരുന്നു ഇന്നലെ പ്രശ്‌നം ചർച്ചയിലൂടെ പരിഹരിച്ചത്.
കരുവന്നൂർ ബാങ്കിൽ 90 ലക്ഷത്തിനടുത്ത് നിക്ഷേപം ജോഷിക്കും കുടുംബത്തിനും ഉണ്ടായിരുന്നു. കുറച്ചു പണം കിട്ടിയെങ്കിലും ഇനിയും 70 ലക്ഷത്തിലേറെ തിരികെ കിട്ടാനുണ്ടെന്നാണു ജോഷി പറയുന്നത്. ഇതിന് വേണ്ടിയാണ് പോരാട്ടം. എല്ലാ വാതിലും മുട്ടി. എന്നാൽ ആശ്വാസം കിട്ടിയില്ല. ഇതുകൊണ്ടാണ് കടന്ന നിലപാടുകൾ എടുത്തത്. വിഷയത്തിൽ നവകേരള സദസ്സിലും ജോഷി പരാതി നൽകിയിരുന്നു. പ്രതിസന്ധികൾ മറികടന്നു താനും കുടുംബവും തിരികെപ്പിടിച്ച ജീവിതവും സമ്പാദ്യവുമാണ് കരുവന്നൂർ ബാങ്കും ജീവനക്കാരും കേരളത്തിന്റെ ഭരണ സംവിധാനവും കൂടി തകർത്തതെന്നു ജോഷി ആരോപിക്കുന്നു.
ജോഷി കേരളപ്പിറവി ദിനത്തിൽ പൊരിവെയിൽ വകവയ്ക്കാതെ നടന്നിരുന്നു. 82 ലക്ഷം നിക്ഷേപം തിരികെ ആവശ്യപ്പെട്ട്. കരുവന്നൂർ ബാങ്കിന് മുമ്പിൽ നിന്ന് ഇരുപതോളം കിലോമീറ്റർ അകലെയുള്ള തൃശൂർ കളക്ടറേറ്റിലേക്ക് ആയിരുന്നു ആ നടത്തം. ഇതേ ആവശ്യമുന്നയിച്ച് കഴിഞ്ഞ തിരുവോണത്തിന് സ്വന്തം വീടിന് മുമ്പിൽ ജോഷി പട്ടിണിസമരം നടത്തിയിരുന്നു. നടപടിയുണ്ടാകാത്തതിനെ തുടർന്നായിരുന്നു നടത്തം. അതും ഫലം കണ്ടില്ല. കരുവന്നൂർ പ്രശ്‌നത്തിൽ കോൺഗ്രസും ബിജെപിയും നടത്തിയ യാത്രകളിൽ പങ്കെടുക്കാൻ ക്ഷണിച്ചെങ്കിലും പോകാതിരുന്നത് എസ്.എഫ്.ഐയിലും ഡിവൈഎഫ്‌ഐയിലും പ്രവർത്തിച്ചിരുന്ന താനിപ്പോഴും സഖാവായതുകൊണ്ടാണെന്ന് ജോഷി പറയുന്നു.
തന്നോടൊപ്പം പ്രവർത്തിച്ചവരിൽ ചിലർ ഭരണതലത്തിലുണ്ടായിട്ടും നിരവധി തവണ ആവശ്യപ്പെട്ടിട്ടും നിക്ഷേപം കിട്ടിയില്ല. ഹൈക്കോടതിയിൽ ഒന്നര വർഷത്തോളം കേസ് നടത്തിയിട്ടും ഫലമുണ്ടായില്ല.'ഭാര്യയുടെ സ്വർണം വിറ്റതും സഹോദരിയുടെയും ബന്ധുക്കളുടേതും ഉൾപ്പെടെയുള്ള പണമാണ് നിക്ഷേപിച്ചത്. കഴിഞ്ഞ ജനുവരിയിൽ ശസ്ത്രക്രിയയ്ക്ക് 12 ലക്ഷം ലഭിച്ചു. ബാക്കി ഒരാഴ്ചയ്ക്കുള്ളിൽ തരാമെന്ന് പറഞ്ഞിരുന്നതാണ്. 8.25 ശതമാനം പലിശയ്ക്കാണ് നിക്ഷേപിച്ചത്.
മൂന്ന് മാസത്തിലൊരിക്കൽ കൂട്ടുപലിശ കിട്ടിയിരുന്നത് 2 വർഷമായി നാല് ശതമാനം വാർഷിക പലിശയേ ലഭിക്കുന്നുള്ളൂ. ഈയിനത്തിൽ മാത്രം 11 ലക്ഷം നഷ്ടപ്പെട്ടു. ഇനി 72 ലക്ഷമേ തരാനുള്ളൂവെന്നാണ് ബാങ്കിന്റെ വാദം. ട്യൂമറിനെ തുടർന്ന് 4 മാസത്തിനിടെ 3 ശസ്ത്രക്രിയ വേണ്ടിവന്നു. ചെവിയിലെ പഴുപ്പ് തലയോട്ടിയെ ബാധിച്ചത് നീക്കിയതോടെ ഇടതുചെവി കേൾക്കാതായി. ഇന്റേണൽ ഓഡിറ്ററും ടാക്‌സ് പ്രാക്ടീഷണറുമായ ജോഷിക്ക് രോഗം മൂലം ജോലി ചെയ്യാനാകുന്നില്ല.
