ലണ്ടൻ: ഓരോ പത്തുവർഷം കൂടുമ്പോഴും ഇംഗ്ലണ്ടിലെയും വെയ്ൽസിലെയും താമസക്കാർക്കിടയിൽ ഓഫീസ് ഫോർ നാഷണൽ സ്റ്റാറ്റിസ്റ്റിക്സ് നടത്തുന്ന ഏറ്റവുംവിപുലമായതും, വിവരങ്ങൾ വെളിപ്പെടുത്തുന്നതുമായ സർവേയാണ് സെൻസസ്. ഏതാണ്ട് രണ്ട് നൂറ്റാണ്ടുകളായി തുടരുന്ന ഈ പതിവ് സാമൂഹ്യ ശാസ്ത്രജ്ഞന്മാർക്കും നയപരിപാടികൾ രൂപീകരിക്കുന്നവർക്കും ഏറെ പ്രയോജനകരമായ വിവരങ്ങൾ പ്രദാനം ചെയ്യുന്നുമുണ്ട്. 2001-ൽ ആയിരുന്നു മതവുമായി ബന്ധപ്പെട്ട് ചോദ്യങ്ങൾ ഇതിൽ ഉൾപ്പെടുത്താൻ തുടങ്ങിയത്.

അതിൽ ഉൾപ്പെടുത്തിയിരിക്കുന്ന ''എനി അദർ റിലിജിയൻ'' എന്ന കോളം രാജ്യത്ത് വളരെ കുറച്ച് ആൾക്കാർ മാത്രം പിന്തുടരുന്ന പല വിശ്വാസങ്ങളെ കുറിച്ചുമുള്ള കൃത്യമായ ഉൾക്കാഴ്‌ച്ച നൽകുന്നു. അതിൽ ഏറ്റവും അതിശയകരമായ കാര്യം സ്വയം വാഴ്‌ത്തപ്പെട്ട മന്ത്രവാദികളുടെ എണ്ണം വർദ്ധിച്ചു വരുന്നു എന്നതാണ്. 2021 ലെ സെൻസസ് പ്രകാരം, ബ്രിട്ടനിൽ മന്ത്രവാദ ക്രിയകൾ ചെയ്യുന്നവരുടെ എണ്ണം 13,858 ആണ്. കഴിഞ്ഞ ഒരു പതിറ്റാണ്ടിൽ ഉണ്ടായിരുന്നതിനേക്കാൾ 6.3 ശതമാനം കൂടുതൽ.

അടുത്ത കാലത്തായി ടിക്ടോക് പോലുള്ള സാമൂഹ്യ മാധ്യമ പ്ലാറ്റ്ഫോമുകൾ മന്ത്രവാദത്തിലുള്ള താത്പര്യം വർദ്ധിപ്പിച്ചിട്ടുണ്ട്. വിച്ച് ടോക്ക് വീഡിയോകൾ എന്നറിയപ്പെടുന്ന, മന്ത്രവാദവുമായി ബന്ധപ്പെട്ട വീഡിയോകൾ മൊത്തത്തിൽ 30 ബില്യൻ വ്യുവിലേറെ സമ്പാദിച്ചു കഴിഞ്ഞിരിക്കുന്നു. അതേസമയം,,പുതിയതായി ഈ രംഗത്തേക്ക് എത്തുന്നവർക്കായുള്ള ബേബി വിച്ച് വീഡിയോകളുടെ വ്യുവർഷിപ്പ് 600 മില്യൻ കടന്നിരിക്കുന്നു.

മന്ത്രവാദത്തിന്റെ ജനപ്രീതി വർദ്ധിച്ചു വരുന്നത് കണ്ട് 2019-ൽ തന്നെ ന്യുയോർക്ക് ടൈംസ് ചോദിച്ചിരുന്നു, ''എല്ലാവരും മന്ത്രവാദികൾ ആകുന്ന കാലം എന്നാണ് വന്നു ചേരുന്നത് ?'' എന്ന്. അതിൽ എപ്പോൾ എന്നതിന് ഒരുപക്ഷെ ഉത്തരം നൽകാനാവില്ലായിരിക്കും. എന്നാൽ അറ്റ്ലാന്റിക് സമുദ്രത്തിന്റെ ഇങ്ങേക്കരയിൽ, എവിടെ എന്നതിന് വ്യക്തമായ ഒരു ഉത്തരമുണ്ടെന്നാണ് ഡെയ്ലി എക്സ്പ്രസ്സ് പറയുന്നത്. കോൺവാളിലാണ് ഏറ്റവും അധികം മന്ത്രവാദികൾ ഉൾലത്. ഇവിടെ 267 പേരാണ് ഇത്തരം കർമ്മങ്ങൾ ചെയ്യുന്നവരായി ഉള്ളത്.

ഒരുകാലത്ത് രാജ്യത്തിന്റെ തെക്ക് പടിഞ്ഞാറൻ ഭാഗങ്ങൾ യക്ഷികളുടെയും പ്രേതങ്ങളുടെയും ഒക്കെ ആവസസ്ഥാനമായാണ് അറിയപ്പെട്ടിരുന്നത്. ആ ചരിത്രമൊക്കെ അറിയാവുന്നവർക്ക് പക്ഷെ ഈ വാർത്ത തെല്ലും അദ്ഭുതം സൃഷ്ടിക്കില്ല. ഇത്തരം നാടോടിക്കഥകൾക്കും ഐതിഹ്യങ്ങൾക്കും സ്ഥാനമൊരുക്കി വടക്കൻ തീരപ്രദേശ ഗ്രാമമായ ബോസ്‌കാസിലിൽ ഒരു മ്യുസിയം ഓഫ് വിച്ച്ക്രാഫ്റ്റ് ആന്ദ് മാജിക് കൂടി ഉണ്ടെന്നുള്ളത് ഓർക്കുക.

മന്ത്രവാദവും, പ്രാചീന അനുഷ്ഠാനങ്ങളുടെ ആധുനിക രൂപമായ വിക്കയും ഇപ്പോൾ പല വർത്തമാനകാല പേജൻ പ്രസ്ഥാനങ്ങളുടെയും അവിഭാജ്യഘടകമായി മാറിയിരിക്കുന്നു. ക്രിസ്തുവിന് മുൻപുണ്ടായിരുന്ന വിശ്വാസങ്ങളെയും ആചാരങ്ങളെയും പൂജിക്കുന്ന പുരോഹിതരും വിഗ്രഹാരാധകരും ഒക്കെ ഇത്തരം കർമ്മങ്ങളെ പ്രോത്സാഹിപ്പിക്കുന്നവരാണ്. കോൺവാൾ മന്ത്രവാദികളുടെ എണ്ണത്തിൽ മുന്നിലെത്തിയപ്പോൾ 175 പേരുമായി ബിർമ്മിങ്ഹാം രണ്ടാംസ്ഥാനത്തും, 170 മന്ത്രവാദികളുമായി വിൽറ്റ്ഷയർ മൂന്നാം സ്ഥാനത്തും, 140 മന്ത്രവാദികളുമായി പ്ലിമത്ത് നാലാം സ്ഥാനത്തും എത്തി.

മറുനാടന്‍ ഡെസ്‌ക്‌

    മറുനാടന്‍ ഡെസ്‌ക്‌