ന്യൂഡൽഹി: പുൽവാമ ഭീകരാക്രമണത്തിനു ബാലക്കോട്ടിലെ മിന്നലാക്രമണത്തിലൂടെ ഇന്ത്യ നൽകിയ മറുപടിയും ശക്തമായ നയതന്ത്ര ഇടപെടലുകളും പാക്കിസ്ഥാൻ ഭരണകൂടത്തെ എത്രത്തോളം ഭയപ്പെടുത്തിയിരുന്നുവെന്ന് വെളിപ്പെടുത്തി പാക്കിസ്ഥാനിലെ ഇന്ത്യൻ ഹൈക്കമ്മിഷണറായിരുന്ന അജയ് ബിസാരിയ. ഖത്തൽ കി രാത്ത് (രക്തച്ചൊരിച്ചിലിന്റെ രാത്രി) എന്ന് മോദി തന്നെ പിന്നീട് വിശേഷിപ്പിച്ച 2019 ഫെബ്രുവരി 27ന് രാത്രിയിൽ നടന്ന നയതന്ത്ര നീക്കങ്ങളടക്കം 'ആങ്കർ മാനേജ്‌മെന്റ്: ദ് ട്രബൾഡ് ഡിപ്ലോമാറ്റിക് റിലേഷൻഷിപ് ബിറ്റ്‌വീൻ ഇന്ത്യ ആൻഡ് പാക്കിസ്ഥാൻ' എന്ന പുസ്തകത്തിലാണ് ബിസാരിയയുടെ തുറന്നുപറയുന്നത്.

ഇന്ത്യയുടെ ശക്തമായ നയതന്ത്ര ഇടപെടലുകൾ ഭീകരവാദത്തോടുള്ള സമീപനത്തിൽ മാറ്റം വരുത്താൻ പാക്കിസ്ഥാനെ നിർബന്ധിതമാക്കിയെന്നും അജയ് ബിസാരിയ പറയുന്നു. ഇന്ത്യൻ വ്യോമസേന വിങ് കമാൻഡർ അഭിനന്ദൻ വർധമാൻ പാക്കിസ്ഥാന്റെ പിടിയിലായതിന് പിന്നാലെ പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ ഇന്ത്യ നടത്തിയ നയതന്ത്ര നീക്കങ്ങളാണ് അജയ് ബിസാരിയ വെളിപ്പെടുത്തിയത്. 2019 ഫെബ്രുവരി 27 ന് രാത്രിയിലുണ്ടായ സംഭവ വികാസങ്ങളാണ് അജയ് ബിസാരിയ വിശദമാക്കിയത്.

2019 ഫെബ്രുവരി 14നു നടന്ന പുൽവാമ ആക്രമണത്തിനു പിന്നാലെ ഫെബ്രുവരി 26ന് ബാലക്കോട്ടിൽ ഇന്ത്യ വ്യോമാക്രമണം നടത്തിയിരുന്നു. ഇതിനുശേഷം പാക്കിസ്ഥാനിലേക്ക് ഏതു നിമിഷവും തൊടുക്കാവുന്ന രീതിയിൽ ഒൻപതു മിസൈലുകൾ ഇന്ത്യ സജ്ജമാക്കിയിരുന്നെന്ന് അജയ് ബിസാരിയ പറയുന്നു. ഇന്ത്യയുടെ ആക്രമണം ഏതു നിമിഷവും ഉണ്ടാകുമെന്ന് ഭയന്ന പാക്കിസ്ഥാൻ അർധരാത്രിയിൽ ഹൈക്കമ്മിഷണറായ തന്റെ ഓഫിസിന്റെ വാതിലുകൾ മുട്ടിയെന്നും ബിസാരിയ പറയുന്നു.

പ്രധാനമന്ത്രി നരേന്ദ്ര മോദിയുമായി അന്നു പാക്ക് പ്രധാനമന്ത്രിയായിരുന്ന ഇമ്രാൻ ഖാന് ചർച്ച നടത്തണമെന്നായിരുന്നു അവരുടെ ആവശ്യം. ഖത്തൽ കി രാത്ത് (രക്തച്ചൊരിച്ചിലിന്റെ രാത്രി) എന്ന് മോദി തന്നെ പിന്നീട് വിശേഷിപ്പിച്ച 2019 ഫെബ്രുവരി 27ന് രാത്രിയാണ് നാടകീയമായ ഈ സംഭവങ്ങൾ അരങ്ങേറിയത്. അഭിനന്ദിനെ മോചിപ്പിക്കുന്നതിനുള്ള സമ്മർദതന്ത്രങ്ങൾ അരങ്ങേറിയ ആദ്യ രാത്രിയായിരുന്നു അത്. അന്ന് ഇന്ത്യയും പാക്കിസ്ഥാനും തമ്മിൽ നടന്ന ചർച്ചയുടെ വിശദാംശങ്ങൾ ഇപ്പോഴും പുറംലോകത്തിന് അന്യമാണെങ്കിലും ചില അറിയാക്കഥകൾ അജയ് ബിസാരിയ തന്റെ പുസ്തകത്തിൽ വെളിപ്പെടുത്തുന്നു.

ഫെബ്രുവരി 28നാണ് അഭിനന്ദനെ പാക്കിസ്ഥാൻ മോചിപ്പിക്കുന്നത്. 27ന് അർധരാത്രി ഇന്ത്യയിലെ അന്നത്തെ പാക്കിസ്ഥാൻ ഹൈക്കമ്മിഷണർ സൊഹൈൽ മഹ്‌മൂദിൽ തന്നെ ഫോൺ വിളിച്ചതായി ബിസാരിയ വെളിപ്പെടുത്തുന്നു. തുടർന്ന് പ്രധാനമന്ത്രി നരേന്ദ്ര മോദിയുമായി സംസാരിക്കാൻ ഇമ്രാൻ ഖാൻ ആഗ്രഹിക്കുന്നെന്ന് പറഞ്ഞു. ബിസാരിയ ഡൽഹിയിലെ ആളുകളെ ഇക്കാര്യം അറിയിച്ചശേഷം മഹ്‌മൂദിലിനെ തിരിച്ചുവിളിച്ചു. പ്രധാനമന്ത്രി നരേന്ദ്ര മോദിക്ക് സംസാരിക്കാൻ അസൗകര്യമുണ്ടെന്നും എന്തെങ്കിലും അടിയന്തര സന്ദേശമുണ്ടെങ്കിൽ ഹൈക്കമ്മിഷണറെ തന്നെ അറിയിക്കാമെന്ന് അദ്ദേഹം പറഞ്ഞതായും വ്യക്തമാക്കി. ആ രാത്രി പിന്നീട് പാക്കിസ്ഥാനിൽനിന്ന് ഒരു 'വിളി'യും ബിസാരിയയെ തേടിയെത്തിയില്ല.

അടുത്ത ദിവസം, ഫെബ്രുവരി 28ന്, അഭിനന്ദനെ മോചിപ്പിക്കാനുള്ള തീരുമാനം പാക്കിസ്ഥാൻ പാർലമെന്റിൽ പ്രഖ്യാപിക്കുമ്പോൾ നരേന്ദ്ര മോദിയെ വിളിക്കാൻ ശ്രമിച്ചിരുന്നതായി ഇമ്രാൻ ഖാൻ പറഞ്ഞു. എന്നാൽ ഇതിന്റെ വിശദാംശങ്ങൾ വെളിപ്പെടുത്തിയില്ല. അഭിനന്ദനെ മോചിപ്പിച്ചത് സമാധാന, സൗഹൃദ നിലപാടുകളുടെ ഭാഗമായാണെന്നായിരുന്നു പാക്കിസ്ഥാന്റെ വിശദീകരണം.

എന്നാൽ യുഎസിന്റെയും യുകെയുടെയും അടക്കമുള്ള ഇന്ത്യയിലെയും പാക്കിസ്ഥാനിലെയും നയതന്ത്ര പ്രതിനിധികൾ അഭിനന്ദിനെ ഉപദ്രവിച്ചാൽ സ്ഥിതിഗതികൾ കൂടുതൽ വഷളാക്കുമെന്ന് പാക്കിസ്ഥാനെ ബോധ്യപ്പെടുത്തിയെന്നും ഇതിൽ പാക്കിസ്ഥാൻ പരിഭ്രാന്തരായെന്നും അജയ് ബിസാരിയ പറഞ്ഞു.

ഫെബ്രുവരി 26ന് നടന്ന സംഭവങ്ങൾക്ക് ശേഷം ഈ നയതന്ത്രജ്ഞരിൽ ചിലരെ പാക്കിസ്ഥാൻ തുടർച്ചയായി മൂന്നു തവണ വിളിപ്പിച്ചിരുന്നു. അഭിനന്ദനെ വെറുതെ വിടാൻ മാത്രമല്ല, പുൽവാമ ആക്രമണത്തിൽ നടപടിയെടുക്കാനും പ്രശ്‌നം പരിഹരിക്കാനും പാക്കിസ്ഥാൻ തയാറാണെന്ന് ഇന്ത്യയെ അറിയിക്കാൻ ഇവരിൽ ചിലർ ഇന്ത്യൻ വിദേശകാര്യ സെക്രട്ടറിയെ രാത്രി വിളിക്കുകയും ചെയ്തു. ഇമ്രാൻ ഖാൻ ഈ പ്രഖ്യാപനങ്ങൾ അടുത്ത ദിവസം പാർലമെന്റിൽ നടത്തുമെന്ന് അവർ അദ്ദേഹത്തോട് പറഞ്ഞു.

എസ്സിഒ ഉച്ചകോടിക്കിടെ ബിഷ്‌കെക്കിൽ വച്ച് ഇമ്രാൻ ഖാനും നരേന്ദ്ര മോദിയും തമ്മിൽ ഹ്രസ്വമായ ഹസ്തദാനത്തിനും സംഭാഷണത്തിനുമായി ഇമ്രാൻ ഖാന്റെ അടുത്ത സുഹൃത്ത് ബിസാരിയയെ സമീപിച്ചത് എങ്ങനെയെന്നും പുസ്തകം വെളിപ്പെടുത്തുന്നു. തീവ്രവാദ വിഷയം കൈകാര്യം ചെയ്യുന്നതിൽ മോദിയെ തന്റെ ആത്മാർത്ഥത ബോധ്യപ്പെടുത്തുകയായിരുന്നു പാക്കിസ്ഥാൻ പ്രധാനമന്ത്രിയുടെ ലക്ഷ്യം.

2019ലെ ലോക്‌സഭാ തിരഞ്ഞെടുപ്പ് റാലിയിലാണ് അഭിനന്ദനെ പാക്കിസ്ഥാൻ വിട്ടയച്ചെന്നും അല്ലാത്തപക്ഷം 'ഖത്തൽ കി രാത്ത്' (രക്തച്ചൊരിച്ചിലിന്റെ രാത്രി) ആകുമായിരുന്നുവെന്നും മോദി പറഞ്ഞത്. അഭിനന്ദനെ മോചിപ്പിക്കാൻ പാക്കിസ്ഥാൻ ലക്ഷ്യമാക്കി മിസൈലാക്രമണം പദ്ധതിയിട്ടിരുന്നെന്ന് ഇന്ത്യ ഒരിക്കലും ഔദ്യോഗികമായി പറഞ്ഞിട്ടില്ല, എന്നാൽ ഈ ഭീഷണി പാക്കിസ്ഥാൻ സൈന്യത്തെയും സർക്കാരിനെയും എങ്ങനെ അലോസരപ്പെടുത്തിയെന്നാണ് ബിസാരിയ പറയുന്നത്.

അഭിനന്ദൻ പിടിയിലായതിന് പിന്നാലെ ഇന്ത്യയുടെ ആവശ്യങ്ങൾ ചർച്ച ചെയ്യാൻ ഫെബ്രുവരി 27ന് യുഎസ്, യുകെ, ഫ്രഞ്ച് പ്രതിനിധികളെ പാക്കിസ്ഥാൻ വിദേശകാര്യ സെക്രട്ടറി വിളിച്ചിരുന്നു. യോഗത്തിന്റെ മധ്യത്തിൽ, വൈകിട്ട് 5.45 ഓടെ മറ്റു ചർച്ചകൾ നിർത്തി, ഇന്ത്യയുടെ 9 മിസൈലുകൾ പാക്കിസ്ഥാന് നേരെ തൊടുക്കാൻ തയാറായിനിൽക്കുകയാണെന്ന സൈന്യത്തിൽ നിന്നുള്ള സന്ദേശം വായിച്ചു.

'വിശ്വസനീയമായ ഈ വിവരം' അവരുടെ രാജ്യങ്ങളെ അറിയിക്കാനും നടപടിയിൽനിന്നു പിന്തിരിയാൻ ഇന്ത്യയോട് അവശ്യപ്പെടണമെന്നും വിദേശകാര്യ സെക്രട്ടറി അഭ്യർത്ഥിച്ചു. ഈ പ്രതിനിധികളിലൊരാളുടെ നിർദ്ദേശപ്രകാരമാണ് ആവശ്യം ഇന്ത്യയെ നേരിട്ട് അറിയിക്കാൻ തീരുമാനിച്ചതും ഹൈക്കമ്മിഷണറെ വിളിപ്പിച്ചതും. ഇതിനുശേഷമാണ് നരേന്ദ്ര മോദിയോട് സംസാരിക്കാൻ ഇമ്രാൻ ഖാൻ ശ്രമം നടത്തിയതെന്നാണ് അജയ് ബിസാരിയ പുസ്തകത്തിൽ പറയുന്നത്.

ഒമ്പത് ഇന്ത്യൻ മിസൈലുകൾ തങ്ങളെ ലക്ഷ്യമിടാൻ സാധ്യതയുണ്ടെന്ന ഘട്ടത്തിൽ പരിഭ്രാന്തിയിലായ പാക്കിസ്ഥാൻ സർക്കാർ, ഇമ്രാൻ ഖാനും നരേന്ദ്ര മോദിയും തമ്മിലുള്ള ആശയവിനിമയത്തിന് ശ്രമിച്ചെന്ന് ബിസാരിയ പറയുന്നു. അഭിനന്ദന് എന്തെങ്കിലും ആപത്ത് സംഭവിച്ചാലുണ്ടാകാൻ പോകുന്ന ഇന്ത്യയുടെ സൈനിക നീക്കത്തിൽ പാക്കിസ്ഥാന് ആശങ്കയുണ്ടായിരുന്നു. അഭിനന്ദന്റെ മോചനത്തിലേക്ക് നയിച്ച, നയതന്ത്ര നീക്കത്തിന്റെ ആ രാത്രിയെ 'കതൽ കി രാത്' (രക്തച്ചൊരിച്ചിലിന്റെ രാത്രി) എന്നാണ് നരേന്ദ്ര മോദി വിശേഷിപ്പിച്ചതെന്നും ബിസാരിയ പറയുന്നു.

മറുനാടന്‍ മലയാളി

    മറുനാടന്‍ മലയാളി ബ്യൂറോ