സമസ്തക്കു പിന്നാലെ മുനമ്പത്തേത് വഖഫ് ഭൂമിയാണെന്ന് ഉറപ്പിച്ച് കാന്തപുരം വിഭാഗവും; സമുദായത്തിന് സ്വത്തുക്കള്‍ തിരിച്ചുകിട്ടണമെന്ന് സിറാജ് പത്രത്തില്‍ ലേഖനം; മുജാഹിദുകള്‍ക്കം ജമാഅത്തെക്കും ഫലത്തില്‍ ഇതേ നിലപാട്; വഖഫില്‍ ലീഗ് ഒറ്റപ്പെടുന്നു; സമവായം അകലുന്നു
കോഴിക്കോട്: സമസ്തക്ക് പിന്നാലെ, മുനമ്പത്തേത് വഖഫ് ഭൂമിയാണെന്ന് കാന്തപുരം എ പി വിഭാഗവും. സമുദായത്തിന് അവരുടെ വഖഫ് സ്വത്തുക്കള്‍ തിരിച്ചുകിട്ടണമെന്നും കാന്തപുരം വിഭാഗത്തിന്റെ മുഖപത്രമായ സിറാജില്‍ പറയുന്നു. വഖഫ് എന്ന പൊതുസ്വത്ത് വിറ്റ് കാശാക്കിയവരില്‍ നിന്ന് തിരികെ പിടിച്ചാല്‍ മാത്രമേ വഖഫ് വിവാദം തീരുകയുള്ളൂവെന്നും എ.പി സുന്നി വിഭാഗം എഴുത്തുകാരനും ഗ്രന്ഥകാരനും പ്രഭാഷകനുമായ ഒ.എം. തരുവണ സിറാജിലെ ലേഖനത്തില്‍ എഴുതിയിരിക്കുന്നത്.
മുനമ്പത്തും ചാവക്കാട്ടും മാത്രമല്ലെന്നും സംസ്ഥാനത്തുടനീളം വഖഫ് സ്വത്തുക്കള്‍ കള്ള കച്ചവടം നടത്തിയിട്ടുണ്ട്. അവ മുഴുവന്‍ തിരഞ്ഞു പിടിച്ച് വീണ്ടെടുക്കണമെന്നും ലേഖനത്തില്‍ ആഹ്വാനം ചെയ്യുന്നു. സമഗ്ര അന്വേഷണവും നടപടികളും വേണമെന്നും സിറാജ് മുഖപത്രത്തില്‍ പറയുന്നു. വഖ്ഫ് സ്വത്താണെന്ന് അറിയാതെ സ്വത്ത് വിറ്റ് കാശിറക്കിയാവരാണ് വിവാദത്തിലെ ശരിയായ പ്രതികള്‍. നിരപരാധികളെ മാന്യമായി പുനരധിവസിപ്പിക്കണമെന്നും ലേഖനത്തില്‍ പറയുന്നു.
ലീഗ് ഒറ്റപ്പെടുന്നു
നേരത്തെ മുനമ്പം വിഷയത്തില്‍ ഇതേ നിലപാട് തന്നെയാണ് സമസ്തയും എടുത്തിരിക്കുന്നത്. മുനമ്പത്തേത് വഖഫ് ഭൂമി തന്നെയെന്ന് സമസ്ത മുഖപത്രമായ സുപ്രഭാതവും പറയുന്നത്. വഖഫ് ഭൂമി അഡ്ജസ്റ്റുമെന്റുകള്‍ക്ക് ഉള്ളതല്ലെന്ന് ലേഖനത്തില്‍ പറയുന്നു. എസ്.വൈ.എസ് സെക്രട്ടറി മുസ്തഫ മുണ്ടുപാറയുടേതയിരുന്നു ലേഖനം. വഖഫ് ഭൂമിയെച്ചൊല്ലിയുള്ള ഇപ്പോഴത്തെ തര്‍ക്കം പലര്‍ക്കും സ്വന്തം താത്പര്യം സംരക്ഷിക്കാന്‍കൂടിയാണ്. രാഷ്ട്രീയപാര്‍ട്ടികള്‍ വിഷയത്തെ നിസാരവത്കരിക്കുന്നു. മുനമ്പത്തെ ഭൂമിയുടെ ഇപ്പോഴത്തെ അവസ്ഥയ്ക്ക് കാരണം ഫാറൂഖ് കോളേജ് അധികൃതരും വഖഫ് ബോര്‍ഡും മാറിമാറിവന്ന സര്‍ക്കാരുകളുമാണ്. വിഷയത്തില്‍ ഫാറുഖ് കോളേജിന്റെ ദുരൂഹമൗനം അത്ഭുതപ്പെടുത്തുന്നതാണ്.
ചില രാഷ്ട്രീയ നേതാക്കള്‍ എന്ത് അടിസ്ഥാനത്തിലാണ് വഖഫ് ഭൂമി അല്ലെന്ന് പ്രഖ്യാപിക്കുന്നത്. മുസ്ലിം സംഘടനകളുടെ യോഗത്തിലുണ്ടായ തീരുമാനം ആശങ്കയുണ്ടാക്കുന്നത്. മുനമ്പത്തെ കുടികിടപ്പുകാര്‍ നിരപരാധികള്‍. അവര്‍ക്ക് നീത് ലഭിക്കണം. എന്നാല്‍, റിസോര്‍ട്ട് ഉടമകളും വമ്പന്‍ മാഫിയകളുമൊക്കെയാണ് ഭൂമി പിടിച്ചെടുക്കാന്‍ രംഗത്തുള്ളത്.താത്പര്യങ്ങളുടേയും അഡ്ജസ്റ്റുമെന്റുകളുടേയും പുറത്ത് പരിഹാരം കാണേണ്ടതല്ല വഖഫ് സ്വത്ത്. വിഷയത്തില്‍ മതപരമായ പരിഹാരം കണ്ടെത്തേണ്ടതുണ്ട്. പണ്ഡിതന്മാര്‍ വിഷയത്തില്‍ ഇടപെടണം. സര്‍ക്കാരിന് തെറ്റ് പറ്റിയെങ്കില്‍ തിരുത്തുകയും വേണം. എന്നാല്‍, അത് വഖഫ് ഭൂമി ഏറ്റെടുത്ത് കൊണ്ടാകരുത് എന്നും ലേഖനത്തില്‍ പറയുന്നു.
മുനമ്പത്തേത് വഖഫ് ഭൂമി തന്നെയാണെന്നും 1950-ലാണ് അത് വഖഫായതെന്നും സമസ്ത മുശാവറ അംഗം ഉമര്‍ ഫൈസി മുക്കം നേരത്തെ പറഞ്ഞിരുന്നു. 404 ഏക്കര്‍ ഭൂമിയാണ് മുനമ്പത്ത് വഖഫ് സ്വത്തായിട്ടുള്ളത്. വഖഫ് സ്വത്ത് വില്‍ക്കാന്‍പാടില്ല. അതറിയാതെ സ്ഥലംവാങ്ങിയവര്‍ക്ക് വിറ്റവരില്‍നിന്ന് വില തിരികെവാങ്ങിക്കൊടുക്കുകയാണ് സര്‍ക്കാര്‍ ചെയ്യേണ്ടത്. അവിടെ ആളുകളെ ഇളക്കിവിടുന്നത് അറുപതോളം റിസോര്‍ട്ടുകാരാണ്. നിരപരാധികളായ കുടിയേറ്റക്കാരെ രക്ഷിക്കണം. അങ്ങനെയാണ് പ്രശ്നം പരിഹരിക്കേണ്ടത്. കോഴിക്കോട് ഫാറൂഖ് കോളേജ് സ്ഥിതിചെയ്യുന്ന സ്ഥലവും വഖഫാണ്. തന്റെ വാക്കുകള്‍ ചില ചാനലുകള്‍ നിരന്തരം വളച്ചൊടിക്കുകയാണെന്നും താന്‍ പറയുന്നതും സമസ്തയുടെ നിലപാടും ഒന്നുതന്നെയാണെന്നും ഉമര്‍ ഫൈസി പറഞ്ഞു.
ഇതോടെ മുനമ്പം വിഷയത്തില്‍ സവവായത്തിന് ശ്രമിക്കുന്ന മുസ്ലീം ലീഗ് ഫലത്തില്‍ ഒറ്റപ്പെട്ട നിലയിലാണ്. പുറമെ ആളുകളെ ഒഴിപ്പിക്കുന്നതിന് എതിരാണ് എന്ന് പറയുന്നുണ്ടെങ്കിലും ഇത് വഖഫ് ഭൂമിതന്നെയാണെന്നും, അത് തിരിച്ചുപിടിക്കണമെന്നുമാണ് മുജാഹിദുകളും, ജമാഅത്തെ ഇസ്ലാമി അടക്കമുള്ളവരും പറയുന്നതും. എന്നാല്‍ രാജാവില്‍നിന്ന് സത്താര്‍ സേട്ടുവിന് ഇത് പാട്ടക്കരാറിലൂടെ കിട്ടിയതാണെന്നും, അതിനുശേഷം ഫാറൂഖ് കോളജുമായുള്ള കേസിന് ശേഷം നാട്ടുകാര്‍ ഇത് വിലകൊടുത്ത് വാങ്ങുകയായിരുന്നുമുള്ള കാര്യങ്ങളൊക്കെ ഇവര്‍ തന്ത്രപുര്‍വം വിസ്മരിക്കയാണ്.
മുനമ്പത്തെ 600-ലേറെ വരുന്ന കുടുംബങ്ങളാണ് വഖഫ് അധിനിവേശത്തില്‍ ദുരിതം അനുഭവിക്കുന്നത്. ഇന്ന് വഖ്ഫ് അധിനിവേശത്തിനെതിരെ രാഷ്ട്രീയ-മത-സമുദായ സംഘടനകള്‍ എസ്എന്‍ഡിപി യാഗത്തിന്റെ നേതൃത്വത്തില്‍ ചെറായി ബീച്ച് മുതല്‍ മുനമ്പം ബീച്ച് വരെ മനുഷ്യച്ചങ്ങല തീര്‍ക്കും. ഇന്ന് വൈകുന്നേരം 3.30-നാണ് ആയിരങ്ങള്‍ അണിനിരക്കുന്ന മനുഷ്യച്ചങ്ങല നടക്കുക.
