പൈനാപ്പിളിനുള്ളിൽ ഒളിപ്പിച്ച് കഞ്ചാവ് കടത്താൻ ശ്രമം; യാത്രക്കാരൻ വിമാനത്താവളത്തിൽ പിടിയിൽ

ദുബായ്: പൈനാപ്പിളിനുള്ളിൽ ഒളിപ്പിച്ച് കഞ്ചാവ് കടത്താൻ ശ്രമിച്ച പ്രവാസി യുവാവ് വിമാനത്താവളത്തിൽ പിടിയിൽ. ആഫ്രിക്കൻ രാജ്യത്ത് നിന്നെത്തിയ യാത്രക്കാരനാണ് ദുബായ് അന്താരാഷ്ട്ര വിമാനത്താവളത്തിലെ ടെർമിനൽ ഒന്നിൽ പിടിയിലായത്. ദുബായ് കസ്റ്റംസ് അധികൃതർക്ക് സംശയം തോന്നി നടത്തിയ പരിശോധനയിലാണ് കഞ്ചാവ് പിടിച്ചെടുത്തത്.

പൈനാപ്പിൾ കൊണ്ടുവന്ന കാർഡ്ബോർഡ് പെട്ടിയിൽ കസ്റ്റംസ് ഉദ്യോഗസ്ഥർക്ക് സംശയം തോന്നി. തുടർന്ന് ഇതിലെന്തെങ്കിലും നിരോധിത വസ്തുക്കളുണ്ടോ എന്ന് അവർ യാത്രക്കാരനോട് ചോദിച്ചു. ഇല്ലെന്ന് അയാൾ മറുപടി നൽകുകയും ചെയ്തു. തുടർന്ന് പെട്ടി സ്‌കാൻ ചെയ്തു.

അപ്പോൾ പൈനാപ്പിളിനകത്ത് കറുത്ത നിറത്തിലെ പ്ലാസ്റ്റിക് ബാഗ് കണ്ടെത്തി. 399 റോൾ കഞ്ചാവാണ് ഇതിൽ നിന്ന് കണ്ടെത്തിയത്. പിടികൂടിയ കഞ്ചാവിന് ആകെ 417.30 ഗ്രാം ഭാരമുണ്ട്. കഞ്ചാവ് കണ്ടെത്തിയതോടെ യാത്രക്കാരനെ വീണ്ടും പരിശോധനയ്ക്ക് വിധേയമാക്കിയെങ്കിലും ഒന്നും കണ്ടെത്താനായില്ല. ഇയാളെ ദുബായ് പൊലീസിലെ ലഹരി വിരുദ്ധ വിഭാഗത്തിന് കൈമാറി.