അജ്മാൻ: യുഎഇയിലെ അജ്മാനിൽ യുവതിയെ കുത്തിക്കൊലപ്പെടുത്തി വ്യാപാര സ്ഥാപനത്തിന് തീയിട്ട സംഭവത്തിൽ പ്രതിയായ യുവാവ് പത്ത് മിനിറ്റിനുള്ളിൽ പിടിയിൽ. തിങ്കളാഴ്ചയാണ് സംഭവം ഉണ്ടായത്. അജ്മാൻ വ്യാവസായി ഏരിയയിലുള്ള കടയ്ക്കാണ് തീകൊളുത്തിയത്. മറ്റ് മൂന്ന് ജീവനക്കാർക്ക് പരിക്കേറ്റു.

സനയ്യയിൽ പ്രവർത്തിക്കുന്ന വ്യാപാര സ്ഥാപനത്തിൽ സ്ത്രീയെ കുത്തി കൊലപ്പെടുത്തിയ ശേഷമാണ് ഏഷ്യൻ വംശജനായ പ്രതി സ്ഥാപനത്തിന് തീകൊടുത്തത്. മൂന്ന് ജീവനക്കാരെ പരിക്കേൽപ്പിക്കുകയും ചെയ്തു. ഏഷ്യൻ വംശജയായ സ്ത്രീയാണ് കൊല്ലപ്പെട്ടതെന്ന് പൊലീസ് അറിയിച്ചു. കടയുടെ മിക്ക ഭാഗങ്ങളും കത്തി നശിച്ചു.

സംഭവം അറിഞ്ഞ് സ്ഥലത്തെത്തിയ അജ്മാൻ പൊലീസും സിവിൽ ഡിഫൻസും അഗ്‌നിശമന വിഭാഗങ്ങളും ചേർന്ന് തീ നിയന്ത്രണവിധേയമാക്കി. പരിക്കേറ്റവരെ ആശുപത്രിയിലേക്ക് മാറ്റി. പൊലീസ് അതിവേഗം ഇടപെടുകയും പത്ത് മിനിറ്റ് കൊണ്ട് പ്രതിയെ പിടികൂടുകയും ചെയ്തു.

പ്രതിക്ക് കൊല്ലപ്പെട്ട സ്ത്രീയുമായി നേരത്തെ ബന്ധമുണ്ടായിരുന്നെന്നും വ്യക്തിപരമായ തർക്കമാണ് കൊലപാതകത്തിലേക്ക് നയിച്ചതെന്നും പ്രാഥമിക അന്വേഷണത്തിൽ കണ്ടെത്തി. പ്രതി കുറ്റം സമ്മതിച്ചു. തുടർ നിയമ നടപടികൾക്കായി കേസ്പബ്ലിക് പ്രോസിക്യൂഷന് കൈമാറി.