'പന്നിയിറച്ചിയും മദ്യവും അടങ്ങിയിട്ടുണ്ട്'; ഓറിയോ ബിസ്‌കറ്റ് ഹലാലല്ലെന്ന് വ്യാജ പ്രചരണം; വിശദീകരണവുമായി യുഎഇ അധികൃതർ
അബുദാബി: ഓറിയോ ബിസ്‌കറ്റിൽ ആൽക്കഹോൾ അംശവും പന്നിക്കൊഴുപ്പും അടങ്ങിയിട്ടുണ്ടെന്ന വ്യാജപ്രചരണം തള്ളി യുഎഇ അധികൃതർ. ഓറിയോ ബിസ്‌ക്കറ്റുകളിൽ പന്നിയിറച്ചിയും മദ്യവും അടങ്ങിയിരിക്കുന്നതിനാൽ അവ ഹലാലല്ലെന്നായിരുന്നു സാമൂഹ്യ മാധ്യമങ്ങളിൽ പ്രചരിച്ചത്. ബിസ്‌ക്കറ്റിൽ പന്നിക്കൊഴുപ്പും ആൽക്കഹോൾ അംശവും ഉണ്ടെന്നത് വ്യാജ പ്രചാരണമാണെന്ന് അബുദാബി അഗ്രികൾച്ചർ ആൻഡ് ഫുഡ് സേഫ്റ്റി അഥോറിറ്റി അറിയിച്ചു.
സോഷ്യൽ മീഡിയയിൽ ഇത്തരം വാർത്തകൾ പ്രചരിച്ചത് ശ്രദ്ധയിൽപ്പെട്ടതോടെയാണ് അധികാരികൾ അവ പരിശോധനയ്ക്ക് വിധേയമാക്കിയത്. അതേസമയം, ആൽക്കഹോൾ, പന്നിക്കൊഴുപ്പ് (പന്നിക്കൊഴുപ്പ്) ഡെറിവേറ്റീവുകൾ എന്നിവയൊന്നും ബിസ്‌ക്കറ്റിൽ അടങ്ങിയിട്ടില്ലെന്നും അധികൃതർ അറിയിച്ചു.
'ഓറിയോ ബിസ്‌ക്കറ്റുകളിൽ പന്നിയിറച്ചിയും മദ്യവും അടങ്ങിയിരിക്കുന്നതിനാൽ അവ ഹലാലല്ലെന്ന് അടുത്തിടെ പ്രചരിച്ചിരുന്നു. ഇത് തെറ്റാണെന്ന് ഞങ്ങൾ നിങ്ങളെ അറിയിക്കുന്നു,' മന്ത്രാലയം പറഞ്ഞു. രാജ്യത്തേക്ക് ഇറക്കുമതി ചെയ്യുന്ന എല്ലാ ഓറിയോ ബിസ്‌ക്കറ്റ് ചരക്കുകളും പരിശോധിച്ച് അവയുടെ രേഖകൾ ഉറപ്പ് വരുത്തിയതായും അഥോറിറ്റി (അദാഫ്സ) വ്യക്തമാക്കി.
ഉൽപ്പന്നത്തിന്റെ ലബോറട്ടറി പരിശോധനയുടെ ഫലം പുറത്ത് വരുമ്പോൾ വ്യാജ പ്രചരണങ്ങളെ സാധൂകരിക്കുന്ന തരത്തിലുള്ള കാര്യങ്ങളൊന്നും കണ്ടെത്താൻ കഴിഞ്ഞിട്ടില്ലെന്ന് അധികൃതർ വ്യക്തമാക്കി. ഈ ഉൽപ്പന്നങ്ങൾ യുഎഇ സ്റ്റാൻഡേർഡിൽ നിഷ്‌കർഷിക്കുന്ന നിരോധനങ്ങളും നിയന്ത്രണങ്ങളും പാലിക്കുന്നുണ്ടെന്ന് അദാഫ്സ പറഞ്ഞു. ബിസ്‌കറ്റ് ഉത്പാദനത്തിന്റെ എല്ലാ ഘട്ടങ്ങളിലും 'മദ്യം, ആൽക്കഹോൾ ഉൽപന്നങ്ങൾ, എഥൈൽ ആൽക്കഹോൾ (എഥനോൾ) എന്നിവ ചേർക്കുന്നത്' യുഎഇ സ്റ്റാൻഡേർഡ് കർശനമായി നിരോധിക്കുന്നുണ്ട്.
