വിവാഹത്തിന് മുമ്പ് ലൈംഗിക ബന്ധം നിഷേധിക്കുന്നതാണ് യഥാർത്ഥ സ്നേഹത്തിന്റെ അടയാളം; ദാമ്പത്യ ജീവിതം ഭദ്രമാക്കാനുള്ള ഏറ്റവും നല്ല മാർഗമിതാണ്: നിലപാട് വ്യക്തമാക്കി ഫ്രാൻസിസ് മാർപ്പാപ്പ

വത്തിക്കാൻ സിറ്റി: വിവാഹത്തിന് മുമ്പ് ലൈംഗിക ബന്ധം നിഷേധിക്കുന്നത് യഥാർത്ഥ സ്നേഹത്തിന്റെ അടയാളമെന്ന് ഫ്രാൻസിസ് മാർപ്പാപ്പ. വിവാഹം വരെ ലൈംഗിക ബന്ധം വിസമ്മതിക്കുന്നത് ദാമ്പത്യ ജീവിതം ഭദ്രമാക്കാനുള്ള ഏറ്റവും നല്ല മാർഗമാണെന്നും അദ്ദേഹം വ്യക്തമാക്കി.

വത്തിക്കാൻ പൊതുസദസിൽ സംസാരിക്കുമ്പോഴാണ് മാർപ്പാപ്പയുടെ പരാമർശം. ഇക്കാലത്ത് ദമ്പതികൾ ലൈംഗിക പിരിമുറുക്കമോ സമ്മർദ്ദമോ കാരണം ബന്ധം വേർപിരിയുകയാണെന്നും അദ്ദേഹം അഭിപ്രായപ്പെട്ടു.വിവാഹത്തിന് മുമ്പ് ലൈംഗിക ബന്ധത്തിൽ ഏർപ്പെടാതിരിക്കുന്നത് മികച്ച തീരുമാനമാണ്. ഇത് സൗഹൃദത്തിന്റെ ആഴം വർദ്ധിപ്പിക്കാനും ദൈവകൃപ സ്വീകരിക്കാനും സമയം കണ്ടെത്തുന്നതിന് യുവാക്കളെ സഹായിക്കുമെന്നും മാർപ്പാപ്പ പറഞ്ഞു.

സോഷ്യൽ മീഡിയയിലൂടെ മാർപ്പാപ്പയുടെ പ്രസംഗത്തിനെതിരെ സമ്മിശ്ര പ്രതികരണമാണ് വന്നുകൊണ്ടിരിക്കുന്നത്. ഒരു ബന്ധത്തിൽ ലൈംഗികതയുടെ പ്രാധാന്യത്തെ ദുർബലപ്പെടുത്തുന്നതാണ് മാർപ്പാപ്പയുടെ പ്രസ്താവനയെന്നാണ് ഇറ്റാലിയൻ തീയോളജിസ്റ്റ് വിറ്റോ മാൻകുസോ പറഞ്ഞു.