'നിർദേശിച്ചത് കാളിദാസ് ജയറാം; ഭാഷയോ ദേശമോ ഒന്നും അറിയില്ല; പണിയാണല്ലോ മുഖ്യം; നേരെ വിട്ടു ചെന്നെയിലേക്ക്; എന്റെ ഡയലോഗ് തങ്‌ളിഷിൽ എഴുതി തന്നു'; തമിഴിൽ അരങ്ങേറ്റം കുറിക്കുന്നതിന്റെ ആഹ്ലാദം പങ്കുവച്ച് നിർമൽ പാലാഴി

കൊച്ചി: തമിഴ് സിനിമയിൽ അരങ്ങേറ്റം കുറിക്കുന്നതിന്റെ ആഹ്ലാദം പങ്കുവച്ച് ഹാസ്യതാരം നിർമൽ പാലാഴി. തമിഴ്‌നാട് മുഖ്യമന്ത്രി എം കെ സ്റ്റാലിന്റെ മകനും നടനും നിർമ്മാതാവുമായ ഉദയനിധി സ്റ്റാലിന്റെ ഭാര്യയുമായ കൃതിക ഉദയനിധി സംവിധാനം ചെയ്യുന്ന വെബ് സീരീസിലൂടെയാണ് താരം തമിഴിൽ എത്തുന്നത്.

കാളിദാസ് ജയറാം നായക വേഷത്തിലെത്തുന്ന 'പേപ്പർ റോക്കറ്റ്' എന്ന സീരീസിൽ താരത്തിന്റെ നിർദേശപ്രകാരമാണ് നിർമൽ ടീമിലെത്തുന്നത്. വമ്പനൊരു ടീമിനൊപ്പം പ്രവർത്തിക്കാനായതിന്റെ സന്തോഷം പങ്കുവയ്ക്കുകയാണ് താരം. ഫേസ്‌ബുക്ക് കുറിപ്പിലൂടെയാണ് താരം ഇക്കാര്യം അറിയിച്ചിരിക്കുന്നത്. സൺഡേ ഹോളിഡേ, ദിവാൻ ജി മൂല ഗ്രാൻ പ്രി, ഫുക്രി തുടങ്ങിയ ഹിറ്റ് ചിത്രങ്ങളിലെ അഭിനയത്തിലൂടെ മലയാളി പ്രേക്ഷകരുടെ മനം കവർന്ന താരമാണ് നിർമൽ.

ഫേസ്‌ബുക്ക് പോസ്റ്റിന്റെ പൂർണരൂപം

ഒരുപാട് സന്തോഷത്തോടെ നിങ്ങളുമായി പങ്കിവയ്ക്കുന്നു.ഈ ലോക്ഡൗണിൽ ജോലി ഒന്നും ഇല്ലാതെ ഇരിക്കുമ്പോൾ സിനിമാ പ്രോമോഷൻ വർക്ക് എല്ലാം ചെയ്യുന്ന പ്രിയ സുഹൃത് സംഗീത വിളിച്ചിട്ട് ഒരു തമിഴ് വർക്കിൽ വേഷം കിട്ടിയാൽ പോവുമോ എന്ന് ചോദിച്ചു മലയാളം അല്ലാതെ വേറെ ഒന്നും അറിയാത്ത എന്നോടൊ ബാലാ...?അതൊന്നും ഇങ്ങള് പ്രശ്‌നമാക്കേണ്ട കിട്ടിയാൽ വലിയ വർക്ക വല്യ ടീമാ..ഏതാ ഇത്ര വല്യ ടീം അവിടുത്തെ മുഖ്യമന്ത്രി ഒന്നും അല്ലല്ലോ..?മുഖ്യമന്ത്രി അല്ല അവരുടെ മകന്റെ ഭാര്യയാണ് ഡയറക്ടർ..ഹേ..?ഹാ.. ന്ന് അവിടുത്തെ മുഖ്യമന്ത്രി സ്റ്റാലിൻ സാറിന്റെ മകനായ ഉദയനിധി സ്റ്റാലിന്റെ ഭാര്യ കൃതിക മാഡം ഡയറക്ട് ചെയ്യുന്ന വെബ്സീരിസിലേക്ക് ആണ്.ഭാഷയോ ദേശമോ ഒന്നും അറിയില്ല പണിയാണല്ലോ മുഖ്യം നേരെ വിട്ടു ചെന്നെയിലേക്ക്. എന്റെ ഡയലോഗ് തങ്‌ളിഷിൽ എഴുതി തന്നു അതെല്ലാം പാലഴിയിലെ ചെറുപ്പം മുതൽ ഉള്ള സൗഹൃദം രജി ചേച്ചിക്ക് അയച്ചു കൊടുത്തു രജി ചേച്ചിയും സതീഷ് ഏട്ടനും അതിന്റെ അർത്ഥം തിരിച്ചു അയച്ചു തന്നു. പിന്നെ ഷൂട്ടിങ്ങ് സമയത്തു പ്രിയ സുഹൃത്തായ പ്രിയ ചേച്ചിയുടെ മകനായ ചിക്കു തുടക്കം മുതൽ അവസാനം വരെ അവന്റെ ജോലിയെല്ലാം നിർത്തിവച്ചു എന്റെ കൂടെ നിന്നു,എല്ലാവരോടും നിറഞ്ഞ സ്‌നേഹം.പിന്നെ ഇതിൽ ഞാൻ എത്താൻ കാരണക്കാരൻ മലയാളത്തിന്റെ അഭിമാനം ജയറാം ഏട്ടന്റെ മകനായ കാളിദാസ് ജയറാം(കണ്ണൻ) ആണ്. അതിശയവും സ്‌നേഹവും തീർത്താൽ തീരാത്ത നന്ദിയും തോന്നി. കാരണം അതുവരെയും നേരിട്ട് കാണുകപോലും ചെയ്യാത്ത കണ്ണനാണ് ഈ കഥാപാത്രതിന് എന്റെ പേര് പറഞ്ഞത് എന്നറിഞ്ഞപ്പോൾ.സീരീസിലെ ആദ്യ സോങ്ങ് റിലീസ് ആയി നിങ്ങളിലേക്ക് എത്തിക്കുന്നു അതിലുള്ള ഏറ്റവും വലിയ സന്തോഷം എന്താണെന്ന് വച്ചാൽ.. കണ്ണാനെ കണ്ണേ, പുഷ്പ്പ സിനിമയിലെ ഹിറ്റ് സോങ്ങ് എല്ലാം പാടിയ സിദ് ശ്രീറാമിന്റെ ശബ്ദത്തിൽ എനിക്കും അഭിനയിക്കാൻ പറ്റി എന്ന് ഉള്ളതാണ് .ദൈവത്തിന് നന്ദി കൂടെ നിൽക്കുന്നവർക്കും.