നടൻ വിഷ്ണു ഉണ്ണികൃഷ്ണനെ നായകനാക്കി ധർമജൻ ബോൾഗാട്ടി ആദ്യമായി നിർമ്മിക്കുന്ന നിത്യഹരിത നായകൻ എന്ന സിനിമയുടെ ഫസ്റ്റ്‌ലുക്കെത്തി.  ആദിത്യ ക്രിയേഷൻസിന്റെ ബാനറിൽ ധർമജനൊപ്പം മനുവും കൂടി ചേർന്നാണ് നിർമ്മിക്കുന്നത്.സൗബിൻ സാഹിർ തന്റെ ഫേസ്‌ബുക്ക് പേജിലൂടെയാണ് പോസ്റ്റർ പുറത്തുവിട്ടത്.

കട്ടപ്പനയിലെ ഋത്വിക്ക് റോഷന് ശേഷം വിഷ്ണു ഉണ്ണിക്കൃഷ്ണനും ധർമജനും മുഴുനീള കോമഡി വേഷം അവതരിപ്പിക്കുന്ന ചിത്രം സംവിധാനം ചെയ്യുന്നത് ഷാജി കൈലാസിന്റെയും ദീപന്റെയും അസ്സോസിയേറ്റായിരുന്ന എ.ആർ.ബിനുരാജാണ്.

പാലക്കാട് കൊല്ലങ്കോട്ട് ചിത്രീകരണം തുടങ്ങിയ ചിത്രത്തിൽ ജയശ്രീ, അനില, ഡബ്ബിങ് ആർട്ടിസ്റ്റ് ശ്രീജയുടെ മകൾ രവീണ എന്നിവരാണ് നായികമാർ. മഞ്ജുപിള്ള, ഇന്ദ്രൻസ്, ജാഫർ ഇടുക്കി, കൊച്ചുപ്രേമൻ തുടങ്ങിയവരാണ് മറ്റു പ്രധാന താരങ്ങൾ.

പൈപ്പിൻ ചുവട്ടിലെ പ്രണയത്തിനു ശേഷം പവി കെ.പവൻ ആണ് ചിത്രത്തിന്റെ ഛായാഗ്രഹണം നിർവഹിക്കുന്നത്. ജയഗോപാൽ തിരക്കഥയൊരുക്കുന്ന ചിത്രത്തിൽ സംഗീതം നൽകുന്നത് നവാഗതനായ രഞ്ജൻ രാജ് ആണ്. കലികയും ഹസീനയും ചേർന്നാണ് ഗാനങ്ങൾ രചിച്ചിരിക്കുന്നത്. കൊല്ലങ്കോട്, നെന്മാറ, പൊള്ളാച്ചി എന്നിവിടങ്ങളാണ് പ്രധാന ലൊക്കേഷനുകൾ.