ധ്യാൻ ശ്രീനിവാസൻ സംവിധാനം ചെയ്യുന്ന ചിത്രത്തിൽ നിവിൻ പോളിയും നയൻതാരയും പ്രധാനവേഷത്തിലെത്തുന്നു. നടൻ അജു വർഗീസാണ് ചിത്രം നിർമ്മിക്കുന്നത്. 'ലൗവ് ആക്ഷൻ ഡ്രാമ' എന്നാണ് ചിത്രത്തിന്റെ പേര്.

ദിനേശൻ എന്നാണ് നിവിന്റെ കഥാപാത്രത്തിന്റെ പേര്. ശോഭയെന്ന കഥാപാത്രമായാണ് നയൻതാരയെത്തുന്നത്. 1989 ൽ റീലീസ് ചെയ്ത ശ്രീനിവാസൻ സംവിധാനം ചെയ്ത വടക്കുനോക്കിയന്ത്രത്തിലെ കഥാപാത്രങ്ങളുടെ പേരാണിത്. എന്നാൽ വടക്ക് നോക്കിയന്ത്രവുമായി ചിത്രത്തിന് ബന്ധമുണ്ടോയെന്ന് ധ്യാൻ ഇതുവരെ വ്യക്തമാക്കിയിട്ടില്ല. ചെന്നൈ പശ്ചാത്തലമാക്കിയാണ് ചിത്രം ഒരുക്കുന്നത്.

വിനീത് ശ്രീനിവാസൻ -നിവിൻ പോളി കൂട്ടുക്കെട്ടിലെത്തിയ തട്ടത്തിൻ മറയത്തിന്റെ അഞ്ചാം വാർഷികം ആഘോഷിക്കുന്ന ചടങ്ങിലാണ് ചിത്രത്തെക്കുറിച്ച് പ്രഖ്യാപിക്കുന്നത്. ചിത്രത്തിന്റെ കഥയും തിരക്കഥയും നിർവഹിക്കുന്നതും ധ്യാൻ ശ്രീനിവാസനാണ്.