കുവൈറ്റ് സിറ്റി : എൻ.എസ്.എസ്. (നായർ സർവ്വീസ് സൊസൈറ്റി) കുവൈറ്റ്, ഭാരവാഹികൾ ഇന്ത്യൻ അംബാസിഡർ സുനിൽ ജെയിനെ സന്ദർശിച്ചു. ജനറൽ സെക്രട്ടറി പ്രസാദ് പത്മനാഭൻ പുതുതായി തെരഞ്ഞെടുത്ത ഭാരവാഹികളെ അംബാസിഡർക്ക് പരിചയപ്പെടുത്തി.

നാളിതുവരെ എൻ.എസ്.എസ്. കുവൈറ്റ് സാമൂഹിക സാംസ്കാരിക രംഗത്ത് ചെയ്തുവന്ന പ്രവർത്തനങ്ങളെക്കുറിച്ച് പ്രസിഡന്റ് ഉല്ലാസ് കുമാർ അംബാസിഡറെ ധരിപ്പിച്ചു. വെൽഫെയർ കോർഡിനേറ്റർ സജികുമാർ എൻ.എസ്.എസ്. നടത്തിവരുന്ന ജീവകാരുണ്യ പ്രവർത്തനങ്ങളെക്കുറിച്ച് വിവരണം നൽകി.

ഇന്ത്യാക്കാരായ പ്രവാസി സമൂഹം കുവൈറ്റിൽ നേരിടേണ്ടി വരുന്ന വിവിധ വിഷയങ്ങൾ അംബാസിഡറുടെ ശ്രദ്ധയിൽപ്പെടുത്തി. എൻ.എസ്.എസ്. കുവൈറ്റിന്റെ പ്രവർത്തനങ്ങളിൽ അദ്ദേഹം സംതൃപ്തി രേഖപ്പെടുത്തുകയും തുടർന്നുള്ള പ്രവർത്തനങ്ങൾക്ക് എല്ലാവിധ സഹായസഹകരണങ്ങൾക്ക് ഉറപ്പ് നൽകുകയും ചെയ്തു.

എൻ എസ് എസിന്റെ ഓണാഘോഷ പരിപാടിയായ 'ശ്രാവണപ്പൂമ്പുലരി 2016' ലേക്ക് ജനറൽ പ്രോഗ്രാം കോർഡിനേറ്റർ ഹരി പിള്ള, വനിതാ സമാജം ജോയിന്റ് കോർഡിനേറ്റർ കീർത്തി സുമേഷ് എന്നിവർ ചേർന്ന് അബാസിഡറെ ക്ഷണിച്ചു. ട്രഷറർ ശ്രീകുമാർ, വൈസ് പ്രസിഡന്റ് മധു വെട്ടിയാർ, ജോയിന്റ് സെക്രട്ടറി അനീഷ് പി നായർ തുടങ്ങിയവർ സന്ദർശന സംഘത്തിൽ ഉണ്ടായിരുന്നു.