സാന്റ ക്ലാര, കാലിഫോർണിയ: നായർ സർവീസ് സൊസൈറ്റി ഓഫ് കാലിഫോർണിയയുടെ ഓണാഘോഷ പരിപാടികൾ ഓഗസ്റ്റ് 26 ശനിയാഴ്ച രാവിലെ 11 മുതൽ 6 വരെ നടക്കും. കാംപ്ബെൽ കാസിൽമോണ്ട് സ്‌കൂൾ ആഡിറ്റൊറിയത്തിൽ വച്ച് നടക്കുന്ന ആഘോഷത്തിൽ ഓണസദ്യയും പല വിധ കലാപരിപാടികളും കായിക പരിപാടികളും ഉണ്ടാകുമെന്നു സംഘാടകർ അറിയിച്ചു. സദ്യക്ക് ജിഷ്ണു തമ്പിയും അരവിന്ദും ഹരി ബാലകൃഷ്ണനും നേതൃത്വം നൽകും. ഏകദേശം നാനൂറോളം അംഗങ്ങൾ പരിപാടിയിൽ പങ്കെടുക്കുമെന്നു പ്രതീക്ഷിക്കുന്നതായി പ്രസിഡന്റ് രാജേഷ് നായർ അറിയിച്ചു.

കാംപ്ബെൽ മേയർ എലിസബത്ത് ഗിബ്ബൺസ് മുഖ്യാതിഥിയായിരിക്കും. മലയാളം ക്ലാസ്സുകളിൽ പരീക്ഷയിൽ വിജയിച്ച വിദ്യാർത്ഥികൾക്കുള്ള സർട്ടിഫിക്കറ്റുകൾ മേയർ സമ്മാനിക്കും. മുൻ മേയർ ജേസൺ ബേക്കറും, മറ്റു പ്രമുഖ സംഘടന നേതാക്കളും എത്തിച്ചേരും.

എൻ.എസ്സ്.എസ്സ് മലയാളം, പുരാണം ക്ലാസ്സുകളിലെ വിദ്യാർത്ഥികൾ അവതരിപ്പിക്കുന്ന മന്ത്രോച്ചാരണ പ്രാർത്ഥന അദ്ധ്യാപകരായ സതീഷ് ബാബുവും ഐശ്വര്യയും നയിക്കും. സുരേഷ് ചന്ദ്രനും ഹരി പുതുശ്ശേരിയും സംഘവും ചേർന്നൊരുക്കുന്ന അലങ്കാരങ്ങൾ ചടങ്ങിനു പൊലിമയേകും.

കേരളീയ നൃത്തങ്ങൾക്കു പുറമേ ഓണ ഗാനങ്ങൾ ഉൾപ്പെടുന്ന സംഗീത പരിപാടികളും അരങ്ങേറും. ഉദയ വേണുഗോപാൽ സംവിധാനം ചെയ്ത ഓണം ഇതിവൃത്തമാക്കിയ സ്‌കിറ്റും കവിത കൃഷ്ണൻ നയിക്കുന്ന തിരുവാതിരയും മധു മുകുന്ദൻ അണിയിച്ചൊരുക്കുന്ന വഞ്ചിപ്പാട്ടും എൻ.എസ്സ്.എസ്സ് പരിപാടികളിലെ സ്ഥിരസാന്നിധ്യമായ കാലിഫോർണിയയിലെ പ്രശസ്ത നർത്തകിയായ നിത്യ അരുൺ അവതരിപ്പിക്കുന്ന നൃത്തങ്ങളും ആഘോഷങ്ങൾക്കു മിഴിവേകും. സ്മിത നായരും പ്രീതി നായരും ചേർന്ന് സംയോജിപ്പിക്കുന്ന കലാപരിപാടികൾ മധു മുകുന്ദനും മിനി നായരും നിയന്ത്രിക്കും. ബിനു ബാലകൃഷ്ണനും സച്ചിത് നായരും ചേർന്ന് പരിപാടികളുടെ ശബ്ദവും വെളിച്ചവും നിയന്തിക്കും. സിന്ധു, സ്വപ്ന, ഗംഗ, പ്രജുഷ, ഐശ്വര്യ അരവിന്ദ് എന്നിവർ അതിഥികളെ വരവേൽക്കും. കായിക പരിപാടികൾക്ക് സുജിത് വിശ്വനാഥൻ നേതൃത്വം നല്കും.

കൂടുതൽ വിവരങ്ങൾ സംഘടനയുടെ വെബ് സൈറ്റ് www.nairs.org ഇൽ ഉണ്ട്. മറ്റ് വിശദാംശങ്ങൾക്കായി പ്രസിഡന്റ് രാജേഷ് നായർ (408 203 1087) സെക്രട്ടറി മനോജ് പിള്ള (408 398 3130) എന്നിവരെ ബന്ധപ്പെടാവുന്നതാണ്.