ഡബ്ലിൻ: വിദേശത്തു നിന്നുള്ള നഴ്‌സുമാർക്ക് അയർലണ്ടിൽ കൂടുതൽ അവസരമൊരുങ്ങുന്നതായി സൂചന. നഴ്‌സ് രജിസ്‌ട്രേഷൻ വേഗത്തിലാക്കാൻ കൂടുതൽ നടപടികൾ വേണമെന്നാവശ്യപ്പെട്ട് നഴ്‌സിങ് ആൻഡ് മിഡൈ്വഫറി ബോർഡ് ഓഫ് അയർലണ്ട് (എൻഎംബിഐ) രംഗത്തെത്തിയതോടെ നഴ്‌സുമാരുടെ പ്രതീക്ഷകൾക്ക് വീണ്ടും ചിറകു മുളയ്ക്കുകയാണ്. ലഭ്യമായിട്ടുള്ള അപേക്ഷകളിൽ 40 ശതമാനം മാത്രമേ രജിസ്റ്റർ ചെയ്തിട്ടുള്ളൂ എന്ന റിപ്പോർട്ടിന്റെ അടിസ്ഥാനത്തിലാണ് രജിസ്‌ട്രേഷൻ നടപടികൾ ശക്തമാക്കണമെന്നാവശ്യപ്പെട്ട് എൻഎംബിഐ രംഗത്തെത്തിയിരിക്കുന്നത്.

2015 ജനുവരി മുതൽ ലഭ്യമായി്ടടുള്ള 4,184 ഓവർസീസ് അപേക്ഷകളിൽ 1632 അപേക്ഷകൾ മാത്രമാണ് രജിസ്റ്റർ ചെയ്തിട്ടുള്ളത്. അതായത് 40 ശതമാനം മാത്രം. ഇതിൽ 1738 നഴ്‌സുമാർ യോഗ്യതകൾ പോരാത്തതിനെ തുടർന്ന് അവരുടെ അപേക്ഷകൾ പിൻവലിക്കുകയും ചെയ്തിട്ടുണ്ട്. ക്വാളിഫൈഡ് നഴ്‌സുമാരുടെ അഭാവം ഏറെ അനുഭവപ്പെടുന്ന ആരോഗ്യമേഖലയിൽ നഴ്‌സുമാരുടെ അപേക്ഷകളുടെ രജിസ്‌ട്രേഷൻ പോലും വൈകിക്കുന്നത് ഞെട്ടിക്കുന്നതാണെന്ന് വിലയിരുത്തുന്നു.

വിദേശത്തു നിന്നുള്ള ഹൈലി സ്‌കിൽഡ് നഴ്‌സിങ് പ്രൊഫഷണലുകളെ രാജ്യത്തേക്ക് ആകർഷിക്കുന്നതിനുള്ള നടപടികൾ ശക്തമാക്കണമെന്ന ആവശ്യവും ഉയർന്നിട്ടുണ്ട്. അതേസമയം നഴ്‌സിങ് രജിസ്‌ട്രേഷൻ നടപടികൾ വേഗത്തിലാക്കാനുള്ള നടപടികൾ സ്വീകരിച്ചിട്ടുണ്ടെന്ന് ഡിപ്പാർട്ട്‌മെന്റ് ഓഫ് ഹെൽത്ത് വക്താവ് വെളിപ്പെടുത്തുന്നു.